Op vriedig 15 november 2024 wurt in het feestpaviljoen aan de Greunsjtraot tiedens ein ongetwiefeld weer sjpetterende ediesie van GeBaORe talent bekènd wae es nuujt jeugprinsepaar veurop maog gaon in het 2025-sezoen van de Borse vastelaovend. Noe is jeugprins of jeugprinses zeen altied ein biezunjer eervolle taak, mèr dit sezoen is het sjus nog get meer spesjaal. De Bessemebènjers viere namelik hun 7×11 jaorig jubelejum, en het belaof ein geweldig feeës te waere!
Zit se kommend sjoaljaor in groep 7 of 8 van Rooms Katholieke Basisschool Swentibold of Openbare Basisschool De Wissel Born en höb se altied gedruimp van zoa’n sjoan prinsepak mèt sjteek en vaere of dae schitterende prinsessejurk mèt dat kruènke in de haore, dan zit de vastelaovend dich in het blood en is dit dien kans om dich op te gaeve es jeugprins, jeugprinses of jeugprinsepaar van De Bessemebènjers.
Dat kènt door eine ie-meel te sjtuure nao jeugd@bessemebenjers.nl mèt dao-in diene naam, adres, laeftied, naam van de sjool en het telefoonnummer van pap en/of mam. Vanwaege het jubelejum dat al in november wurt gevierd zeen v’r d’r dit jaor get vreuger bie es normaal dus lèt good op: de aanmèljinge ontvange v’r gaer véúr 1 juni 2024, want dae daag wurt via laoting bepaald wae de gelökkige zeen.
Liek dich dit hartstikke leuk, mèr höb se eers nog get vraoge? Dan kèn se (de pap of de mam laote) belle nao ózze jeugdbegeleiders:
Pascal van Baaren & Miriam van Baaren-Thissen, 06 – 5579 8266
Pascal & Nicole Simons, 06 – 1072 8261
