Zeet geer de sjnea en kauw van de aafgeloupe tied ouch heëlemaol meug? De Borse Revuu Groep kènt dan ouch good begriepe dat g’r mesjien d’r effe tösje oet wilt. Daoróm zeen zie ’n Reisburo begoos en zörge zie d’rveur dat geer kènt gaon genete van een verdeende vakansie. Of ’t noe op ‘n kemping in eige lendj is, of urges in ’n groate sjtad in Europa, of toch die waereldreis wobie g’r vraem kulture en volkere leërt kènne. ’t Maak neet oet wo g’r haer wilt, de Borse Revuu Groep verzörg uch ’n ónvergaetelikke reis.
Regel noe alvas uch tickets en pak uch koffers, zoadat g’r op zaoterdig 27 jannewarie 2024 óm 20:11 bie ’t gemeinsjapshoes op ’t vleegtuug kènt sjtappe en al uch zörg achter uch kènt laote. Geer waert dan mitgenómme op ’n reis langs de meis vraeme situasies.
Ein ticket om mit te reize kos sjlechs 5 euro, en is te kriege bie ‘t Gemeenschapshuis Born, Delicasa Born of bie Wil Lebens (Vauwersjtraot 16). Lèt op: allein kontante betaling!
Och ja…, geer hoof neet bang te zeen dat g’r op dees reis krank waert. Behauwve boekpien van ’t lache en mesjien sangerdaags koppien van net dat eine glaeske beer dat te väöl waor. V’r zeen uch gaer aan boord!
❤️💛💚 Vastelaovend in Bor, vastelaovend same ❤️💛💚
