Dick woort gebaore es Hendrikus, Theodorus, Johannes Kleinheerenbrink op 28 november 1957 in Krimpen aan de IJsel, ónger ’t sjterrebeerld baogsjötter. Eine echte Hollenjer, dae op 4-jaorige laeftied mit de pap en de mam verhoesde nao Brookzitterd wo hae ouch opgreujde in ’t Haneriek en hae Zittesj plat leërde kalle mit ‘n Holles aksent.
Marlies is ’n ech Bors maedje. Zie zoog es Maria, Wilhelmina Versluis oppe Sjloeswaeg, baove kefee Haagmans, op 2 november 1958 ónger ’t sjterrebeeld sjorpioen ’t laevesleeg es dochter van Harie en Zus Versluis.
’t Seniorepaar woont oppe Mgr. Buckxsjtraot 13, in ein auw kenmerkende boerderie die Dick veur ein groat gedeilte zelf haet verboewd.

Dick kaom in zien jóng jaore in aanraking mit vastelaovend en dae vierde hae dan ouch oetgebreid, meistal in de bènnesjtad van Zitterd. Wie hae Marlies leërde kènne in 1977, woort de vastelaovend in Bor gevierd. Zie lepe mit in de optochte mit buurt De Berg, de Greunsjtraot en buurt Wijndal. Later zaote ze same in ’t gruupke “Boetegeweun” en maakde ze ouch de bühn ónveilig op ’t Leedjeskonkoer en de Revuu.
In 1978 trouwde ’t paar en naodat in 1994 hun auwtste dochter jeugprinses woort, trooj Dick toe tot de raod van èlf. Hae waor dao veural aktief es wageboewer en in 2008 volgde hae Wil Lemmens op es Vors van de Bessemebènjers. Dick veurde dees taak oet tot en mit ’t jubeleumfeës in 2012, wie d’r de vorstescepter euverdroog aan Cliff Verjans. Daonao ging Dick bie de senaat tot 2016. Nao ’n pauze van ’n paar jaor haet ‘r zich weer opnuuj aangesjlaote bie de senaat, want ’t vastelaovesfeës leet ‘m toch neet ech los.
In ziene vriejen tied (en dae haeter sins zien pensjoen genóg) knutselt hae gaer. Ouch tuinere is ein van zien hobbies. Op vakansie geit ‘r ouch gaer en waal zoa’n tweë keër per jaor nao Oasteriek óm lekker te wenjele.
Marlies waor, wie de kènjer gebaore woorte, veural “full time” mam en hoes-manager. In häöre vriejen tied heel ze zich bezig mit de judosjport en waor jaorelank besjtuurslid van de Eëste Judoklup Beeg. Es aktief lid en coach haet ze mit häör pupille väöl toernoje bezóch in bènne- en boetelendj.
Hendjwirke en knutsele zeen de bezighede wo zie häör ganse zeël en zaligheid in lègk. Vreuger waor dat veural kleijer make. Veural mit de vastelaovend. Prinse- en prinsessekleijer make waor ein oetdaging veur Marlies. Zie waor ouch aktief oppe bühn mit ’t vrouwluujgruupke ‘de Housevrouwe’ wobie ze mitdeeg aan ’t Leedjeskonkoer, Revuu en ’t oetrope van de seniorepare.
In 1988 woort nao 3 dochters eindelik eine zoon gebaore. En ‘t woar metein raak. Precies op ‘Rosenmontag’ kaom hae oppe welt in Zitterd. De ganse raod van èlf kaom op kraamvisite in t ziekehoes.
Naodat de auwtste dochter oetverkaoze waor es jeugprinses, waor oppe Bornerkepelsjtraot, want dao woonde ze doe, ’t hèk van de dam: alle veer de kènjer zeen oetgerope es jeugprinses en jeugprins, wodoor de femilie Kleinheerenbrink bekènd sjtóng es hofleveranseer van de vastelaovesvereiniging. Inmiddels zeen ouch al tweë kleinkènjer jeugprins en jeugprinses gewaes van de Bessemebènjers en aangezeen ze 11 kleinkènjer höbbe, zulle d’r nog waal get gaon volge. Ouch de pap en de mam van Marlies waore ’t seniorepaar in 2002. Hie-oet bliek waal dat vastelaovend bie de femilie Kleinheerenbrink-Versluis in de gene zit en wie toepasselik is dan ouch ’t vastelaovesthema van dit jaor: bie de femilie Kleinheerenbrink waor en is ‘t ‘Ummer Raak’
Dick en Marlies zeen dan ouch heël blie dat ze gevraog zeen óm te regere es seniorepaar van de Bessemebènjers, zoa is de cirkel eindelik róndj.

Weer wunsje ós nuuj senioreprinsepaar ein sjoan sezoen en väöl plezeer.