John woort gebaore es Johannes, Gerardus, Hendrikus, Roza Stoffels in Zitterd op 18 juni 1957 ónger ‘t sjterrebeeld Tweëling. In Bor baeter bekènd es meister John van de Swentiboldsjoal wo hae 28 jaor mit väöl plezeer haet les gegaeve aan ruum 600 klein Bèssemebènjerkes.
Hae woont sins ènkele jaore same mit Mariska Buskermolen in de Bartholemeussjtraot nummer 19.
John waor de ènnige zoon van de Opperkater Frits Stoffels van de Katers in Houtem en ’t Vastelaovesviere is häöm dan ouch mit de paplaepel ingegaeve.

In 1964 woort John op heële jónge laeftied al Jeugprins van de Katers en in 1977 bie ‘t 25 jaorig jubeleum van de Katers woort hae oetgerope tot Prins John II. Nao zien prinssjap is hae jaore lank veurzitter gewaes van de vereiniging van Auwt Prinse en haet hae de kar getroch bie diverse jubeleumfeëste van de Katers. John waor in 1981 ein van de mede- oprichters van de Houtemse Revue, die hae 30 jaor geprizzenteerd haet.

Ouch op de Swentiboldsjoal haet hae geprobeerd de kènjer te besjmètte mit ’t vastelaovesvirus. Dat is ‘m aardig gelök: Eine van zien auwt-leërlinge haet ’t zelfs gesjöp tot vors van de Bessemebènjers en hae vervölt die functie op ‘n ónaovolgbare, geweldige meneer.
In ziene vriejen tied vunjt hae ’t sjoan óm same mit Mariska op ‘t skoeterke door ’t Limburgse lendj te toere, of mit de moter in de Eifel en de Ardenne en te genete van al dat lekkers waat zie óngerwaeg taegekómme. Dat zörg d’rveur dat ‘r ouch regelmaotig zich in ’t zjweit mót sjporte in de sjportsjoal. Same mit Mariska zeen zie ouch nog opa en oma van tweë fantastiese kleinkènjer.

John wirk es leërkrach op de SBO sjoal St. Jan Baptist in Kirkraoj. Hae geuf es gids róndjleidinge op ’t Kesjteël Lömmerich, is gewaerdraeger bie Sjötterie St. Jozeph in Buchte en is al meë es 44 jaor lid van de Auwt Prinse Houtem.

Prinses Mariska woort gebaore es Maria, Engelbertha Buskermolen op 8 mei 1964 in Krommenie Noord-Hollendj.

De kleine Mariska verhoesde in oktoaber 1970 op 7 jaorige laeftied nao Lömmerich, ómdat de pap ging wirke op de DSM. Nao de eëste daag op sjoal kaom ze thoes mit de mededeiling: ”Doe ben jij en ich ben ik”. Zie waor al sjnel van dat Hollese aksent aaf en bènne ‘n hawf jaor kaom ze al in aanraking mit de Limburgse vastelaovend. Mariska waor d’n ènnige in ‘t gezin van 3 dochters die dat ‘n geweldig feës vónj. Häör blood begoos al gaw te kriebele bie ’t heuëre van de vastelaovesleedjes. ’t Verkleije en sjminke vónj en vuntj zie nog altied heëlemaol geweldig. In Lömmerich troch ze mit de buurtvereiniging “Kasteelbuurt” in d’n optoch, sjtóng es dansmarietje op de bühne in de Molenbronzaal en zóng de sjterre van d’n hemel op de sjoalkarnaval. Dat geveul veur de Limburgse taal en de vastelaovend is allein mer sjterker gewore en nemes kènt nog heuëre dat zie dao baove in Hollendj gebaore is. Ze veult zich ‘ne echte Limburger en druimp zelfs in ‘t plat.

Nao de leëger sjoal ging Mariska in Bor nao de Mavo, ging op sjtap in Bartok en de Bios en op dees meneer woort ze automaties al ‘n bietje van Bor. Inmiddels woont ze al vanaaf 1984 in Bor.

Mariska wirk es ambulante kapster. Daonaeve teikent en sjildert zie gaer. In 2016 haet zie nog de vastelaovesposter veur de Bessemebènjers maoge sjildere.

Vastelaovend zit in ‘t DNA van allebei en daoróm vónje zie ’t ech ‘n eër wie ze gevraog woorte óm Seniejoreprinsepaar van de Bessemebènjers te waere. John en Mariska wone en laeve in Bor en zeen meistal van de partie es get te doon is in ’t dörp. Same mit uch, jónk en auwt, ós adjudante en de leje van de Bessemebènjers wille d’r weer gaer ‘ne gezellige en onvergaetelikke supersjieke vastelaovend van make.