Jos woord gebaore op 5 mei 1959 ónger ’t sjerrebeeld sjtier. Opgegreujd is hae in ’t Zawpenseriek in Beeg in ’n gezin mit 11 kènjer. Nao zien opleijing es tummerman is hae in de boew gaon wirke. In 1982 haw hae zellefs planne óm nao Canada te emigrere. Dat waor waarsjienlik toch ein bietje te wiet weg, want hae is nog 10 jaor in de boew gebleve. Daonao is hae euvergesjtap nao de Volvo/Nedcar wo hae produksiemitwirker waor in de laksjtraot es autosjpuiter en arbeid- veiligheidsinspecteur. De lèste 10 jaor waor hae dao koördinator van versjillende aafdeilinge.

Door de ekenomische krisis bie Nedcar in 2006 is Jos vriewillig nao 22 deensjaore vertrokke en nao ein korte ómsjoaling begoos bie Veolia, noe Arriva, es bössjofeur/mentor.

De hobbie van ózze senioreprins is fitserenne. Al jaore raos hae op zien fitske deuver de Limburgse waeg. Hae geit regelmaotig op sjtap mit Jacqueline en geneet gaer van ein vekansie in ’t boetelendj.

In 1983 tróf hae zien Jacqueline womit hae op 11 mei 1984 trouwde in Beeg. Zie ginge wone in Buchte in de Sint Catharinahof. Dao höbbe ze ’t mer ein jaor oetgehawte óm vervolges te verhoeze nao Bor in de Wijngaardskamp 25 wo ze tot op vandaag nog ummer wone.

Jacqueline woord gebaore op 29 juni 1959 ónger ’t sjterrebeeld kreef es Jacqueline Stoffels in Haele, ’t riek van de Vreigeliers. Groatgebrach woord Jacqueline bie de Louvermen in Buchte. Nao de huishoudsjoal ging zie wirke bie de Volvo/Nedcar bie interne zake.
In 1986 woord hunne zoon Michael gebaore en neet lang daonao in 1988 hun dochter Monique, die hun in 2014 eine kleinzoon, Roan, sjónk. Ein gesjenk wo zie enorm van geneete.
Naodat de kènjer de leëgere sjoal in Bor hawwe verlaote, haet Jacqueline t werk weer opgepak bie versjillende oetzendbureaus. De lèste jaore wirk Jacqueline in de zorg en is oppas-oma van hunne kleinzoon Roan.

Senioreprins Jos I en zien Prinses Jacqueline hoofde gein mement nao te dènke wie zie gevraog woorte veur dees taak. Zie höbbe d’r väöl zin in óm same mit de Bessemebènjers ein sjoan vastelaovessezoen te belaeve ónger hun laevesmotto:

Eine daag neet gelache is eine dag neet gelaef
Maak af en toe plezeer in uch laeve,
want ’t is te kort óm altied mit zörg te laeve
Blief lache en maak d’r eine sjoane vastelaovend van.

Aldus opgeteikend en aafgerope op 11 jannewarie 2020