Youri woort gebaore es zoon van Henk en Marja van der Land op 15 meërt 1982 in Oosterhout es Kaaiendonker, es Youri, Gregory van der Land ónger ‘t sjterrebeeld vösje.

Anouk woort gebaore es dochter van ’n Bors maedje Wies Worms en ‘ne Louverman Ruud Janssen op 20 meërt 1981 in Buchte es Anouk, Leona Janssen, ein Louverbessemke, ouch ónger ‘t sjterrebeeld vösje.

Youri en Anouk wone op de Bartholemeussjtraot 34 in Bor. Ze höbbe samen tweë zone Vince en Mick en Youri haet ouch nog ‘n dochter Chayenne.

Kaaiendonker is ‘r neet lang gewaes, want op 3 jaorige laeftied verhoesde de femilie nao Renkum, vervolges nao Westervoort en op zien 10de kaome ze in Bor op de Parkwaeg terech.
Op sjoal waor Youri, zoa wie hae zelf zaet, neet zoa leërgierig.
Nao de Swentiboldsjoal ging hae nao ‘t Kleesj in Zitterd. Nao ’t eëste jaar moos hae dao al ‘n sjtepke trök doon nao de MAVO in Bor. Dao haolde hae zien diploma es lèste lichting van St. Jacobus, dat toen verangerde in DaCapo.
Hae ging weer trök nao ’t Kleesj en haolde dao ’t HAVO-diploma es lèste lichting van ’t Kleesj, dat toen verangerde in Trevianum. Of Youri op ein of anger meneer invloed haet gehad op die naamwieziginge is neet dudelik.
Nao ’t Trevianum begoos hae ’n sjtudie aan de Pabo, mer dat bleek toch neet zoa’n gooj keus. Hae besjloot óm te sollicitere bie de marechaussee. Dao haet ‘r 14 jaor gewirk. Door de deenste, die van häöm verwachde dat ‘r väöl in de Rendjsjtad aanwezig waor, en daobaovenop ouch nog ’n oetzending nao Afghanistan, waor Youri te väöl van hoes weg. Dat maakde dat ‘t zien femielie te väöl moos misse.
In 2017 solliciteerde hae bie de gemeinte Remunj. Dao is ‘r wiekregisseur, es verbènjer tösje de luuj in de wiek en de gemeinte Remunj. Óm in legerterme te blieve: verbènjingsoffeseer.
Sjportief gezeen is Youri ouch nog ummer actief. Hae voetbalt nog in ’t tweëde en ouch nog bie de veterane van VV Bor. Ouch is ‘r al 10 jaor jeugleider. Daomit begoos hae wie de auwtste zoon 4 jaor waor. Neet gek dat ‘r in 2020 tot voetbalprins woort oetgerope. Dao deeg ‘r de eëste en wat noe bliek cruciale vastelaoveservaringe op. Neet dat ‘r nog wiejer gein vastelaovend haw gevierd in Bor, want eder jaor truk hae mit in d’n optoch mit de Voetbalvrunj. De klup wo hae ech groate fan van is, is Feyenoord. Toch haet ‘r ouch ’n sezoenskaart van Fortuna, die hae bie de thoeswedstrieje hartstochtelik aanmoedig, behalve…. es Feyenoord op bezeuk kump, want dan is ‘r toch ech Feyenoordfan.
In zien kontakte mit ziene beste vrundj Michael van kefee De Sjloes, dae ech fan is van PSV, is dit soms waal ’n dènk. Es d’r ’ne wedsjtried is tösje Feyenoord en PSV, krig Youri altied ’n appje van Michael mit de teks: “Sukses!”. Dat krig Youri neet euver zien hart en entjwoord dan altied mit: “Fejne wedstrijd!”
’n Anger hobby van Youri is poolbiljarte. Dat deit ‘r in kefee De Sjloes al 27 jaor. De lèste jaore is Youri dao de veurzitter van dees vereiniging.
Prins en prinses waere is veur Youri en Anouk ein groate eër, mer veural ouch sjpannend, zeker ómdat Youri nog ummer Holles sjpruk es gebaore Brabander.

Anouk kènde Youri al langere tied, vanaaf de MAVO, mer toen haw ze nog neet ech ‘ne klik mit häöm. In 2007 in kefee De Sjloes sjpróng de vónk waal euver. ’t Waor auwt op nuuj 2006/2007 en tot op vandaag is die vónk nog neet gedouf.
Es Louverwiefke waor Anouk in 1991 Jeugprinses bie de Louvermen. Ouch dat waor neet gek, want in häör ganse femilie wemelt ’t van de auwt prinse en prinsesse.
Nao de MAVO is Anouk begoos aan de opleiding facilitair management MBO en daonao HBO. In 2000 besjloot ze te sollicitere bie de luchmach. Dao haet ze gewirk tot 2006.
Daonao haet Anouk 14 jaor gewirk bie ’n oetzendbureau in Zitterd en sins 2020 is Anouk wirkzaam bie Zuyderland Thuishulp op P&O.
Anouk is erg sjportief. Ze rent heël väöl, drie keër per waek zoa’n 35 km. In de coronatied is Anouk begoos mit renne, ómdat fitnesse neet meë koos. Dat beveel zoa good dat ze al tweë keër de marathon van Rotterdam haet geloupe.
Fitnesse deit ze noe ouch weer regelmaotig bie Fitness en Zo.
De voetbalwedsjtriede van Vince en Mick waere altied bezóch es vaste supporter.
Mit vastelaovend is zie ouch van de pertie bie de Voetbalvrunj óm mit deze groep in d’n optoch te trèkke en vastelaovend te viere.

‘t Vastelaovessezoen is dit jaor neet zoa lank, dus geit ós prinsepaar d’r taegenaan mit hun motto:
“Tiedes dees race taege de klok, gaon v’r door tot de lèste sjlók”

Weer wunsje ós prinsepaar ein geweldig sjoan sezoen in ’t thema: “Ummer Raak”
Alaaf!