Youri woort gebaore op 20 juni 1996 es zoon van Bela Balász en Elvira Greijn oppe Borner Veldjsjtraot en noe woonechtig oppe Pötsjtraot 14.

Vanaaf zien gebaorte is Youri door de pap en de mam mitgenomme in de vastelaovend. Nog veur zien gebaorte waor de pap al Prins van de Katers in Houtem, ziene nônk Ber waor Prins van Bor bie de Pierewieters en in daen tied leep hae in ein zjwart rokkestuumke, gemaak door oma Ineke, es “Vors” door de vastelaovend. ’t Koos neet oetblieve dat Youri Jeugprins woord in 2008. Auch zien oma waor in 2014 Senioreprinses van de Bessemebènjers. Nao dit alles is ’t natuurlik neet vraem dat Youri noe d’n eëste Jeugprins is dae auch ’t hoage ambt van Prins maog vervölle. Wie bezunjer is dat neet naeve Senioreprins Huub II dae auch Prins gewaes is!

Optoch, Borse Revuu en Kènjer Pleej Bek Sjoo, euveral deeg Youri aan mit en dao haet ‘r heël get buun-ervaring opgedaon. Legendaries waor zien optraeje mit ’t leedje: “Papa, ik lijk steeds meer op jou” van Stef Bos, womit hae bie papa Bela al gaw de traone in de ouge dreef. Frans Bauer, André Hazes en Michael van Gerwen zeen rolle die häöm op ’t lief gesjreve waore.

Youri is in ’t dageliks laeve lasjer bie de meziekinstrementefebrik Adams in Ittervoort. In ziene vriejen tied is hae lid van ’t Kènjervekansiewerk en de Auwt Jeugprinse Bor. Voetballe waor zien sjport, mer zien kepotte kneeje zörge d’rveur dat dat neet meër meugelik is. Waal is hae eine vaste supporter van ’t eëste van Bor.

Regelmaotig zit’r in de sjportsjoal óm zien figuur in vorm te hawte. Dat is auch waal neuëdig, want feëste mit vrunj is ein anger hobbie van Youri. ’t Leefste watter deit is op sjtap gaon en sjtóm kalle aan ’t befèt. Bie alle vastelaovesaktievieteite is Youri dan auch eine vaste gas. Hae veult zich erg betrokke bie ’t vereinigingslaeve en sjteit altied klaor om ein helpende hendj te beeje.

Weer zeen d’r van euvertuug, dat v’r mit Prins Youri I ein iezersterke keus gemaak höbbe en hae d’r same mit alle Bessemebènjers eine sjoane en IEZERSJTERKE vastelaovend van geit make.

Bie graasie van de Bessemebènjersproklamasie gaef ich, Prins Youri I dees verklaoring oet wo ederein zich aan te hawte haet:

Ten 1^ste:
Ich es Prins ben greuëtsj want ich bèn de eëste, dae hiej auch in Bor es Jeugprins mit uch mit maogde feëste.

Ten 2^de:
Sven belofte maak sjout, dus hawt dich mer vas, en haol ‘t narrepak mer oet de kas.

Ten 3^de:
Vanaaf vandaag tot Esjelegoonsdig, dao is gein óntkómme meër aan, hink bie jederein aan de gevel de Bessemebènjersvaan.

Ten 4^de:
FF Serieus, gaot al mer d’ropoet om nuuj pekskes te koupe, want geer kómt veur miene Prinsewaage te loupe.

Ten 5^de:
‘t Eëste van vv Bor, die wedsjtrijde mót ich es supporter effe euversjlaon, dees daag gaot g’r mich misse, mèr es d’r gein voetbal is, dan môt g’r mit z’n alle achter mich komme sjtaon.

Ten 6^de:
Al mien nichskes en naefkes, regelt uch alvas ein ôngerkômme, want aan vastelaovend viere in Bor kènt geer neet meër ontkômme.

Ten 7^de:

Zörg allemaol d’rveur wie ’t heuërt: alle sjtraote motte road, gael en greun zeen gekleuërd.

Ten 8^ste:
Ich ugge Prins en miene pap de keuning van de Sjötte, noe waert mèr neet sjloes, behenjeld ôs mer wie ’t keuniklik hoes.

Ten 9^de:

Veer höbbe noe aan alle sirrieuze zake sjieët, en make same van deze vastelaovend eine onvergaetelikke tied.

Ten 10^ste:
Ómdat ich naeve ’t Bessemebènjersbeeld woon, jao ich gaon ’t uch zèkge, op deensdigaovend motte v’r eës nog ‘nne ekstra optoch laote trèkke, auch al zeen ’t dan al de late oere, ôzze vastelaovend zal zoa waal get langer doere.

Ten 11^de:
Leef luuj, hie sjtaon ich veur uch,  jônk en väöl zin d’rin, kom mit mich mit, zörg veur gooj zin,
effe geine tied veur de baas en ’t werk, Vastelaovend in Bor is dit jaor Iezersjterk!

Dees proklamasie gultj van de Sjloes tot aan d’n autoweg en van de sjpaorbrök tot en mit de Stjeinakkerwaeg.

Aldus opgeteikend en aafgeroope op 12 jannewarie 2019.