Lars is eine jóng van Hub en Tiny Dullens, auwt-prinsepaar van de Pierewieters in 1995.
Lars woord, ’n waek nao de vastelaovend, gebaore op 25 fibberwarie 1985. Hae is groat gebrach mit vastelaovend en is d’r veural heël greuëtsj op dat hae Prins maog waere, precies 2 x 11 jaor naodat ziene pap Prins waor.

Lars woont al ein aantal jaore same mit zien maedje Anouk, ein Graasboerin oet Zöstere, op Minerva 46, mer bènnekort wurt Kepelwaeg 46a ingerich es nuut prinselik palies. Zie tróffe zich ach jaor geleje in de voetbalkentien en in Zitterd in ‘t kaffee, mer ’t ging pas ech aan in Mesjtreech op d’n 11de van d’n 11de, wienae anges!
Ózze nuuje prins wurt al jaore geneump es kandidaat. Hae wol auch waal gaer, mer sjuufde ’t altied vuur zich oet. Tot dit jaor ’t thema van de vastelaovend “Doog mer geweun” woord gekaoze. Dat waor veur Anouk de aanleijing óm taege Lars te zègke: “Geweun doon!”

Lars is opgelèdj in ’t multimedia- en reklamevak en wirkde tot veur kort in Tegele bie Agmi Traffic & Lighting. Vanaaf 16 jannewarie wurt Lars eine kollega van Anouk en geiter aan de sjlaag bie Daily Fresh Food wo d’r wurt aangesjtèld in de functie marketing communicatie. Daonaeve haet hae auch ein eige bedriefke, Ikreatief Media, woveur hae ónger angere grafisch werk deit en websaits boewt. Deze sait van de Bessemebènjers is dao ein sjoan veurbeeld van. Es hobbie haeter muziek make, voetballe in ’t driede en in de fitness wirk hae regelmaotig aan zien kondiesie. Bie de voetbalklup zit Lars bie de aktiviteitekemissie.
Sins 2013 is Lars ouch de animator achter ’t Leedjeskonkoer nuuje sjtiel. En de jaorlikse optoch geit zeker neet aan Lars veurbie. Begoos mit de pap en de mam bie de BOV, later mit de voetbalvrunj en tösjedoor mit Effe Serieus, truk hae noe same mit Anouk oppe hoagste wage in de vastelaovesoptoch door Bor.

Esof ’t zoa mót zeen, woord auch Anouk ein waek nao de vastelaovend gebaore op 9 meërt 1992. Es Graasboerin is zie al 5 jaor lid van De Bessemebènjers. Ze wirk ouch in Gelaen bie Daily Fresh Food en zou good mótte weite wiese gezóndj mós aete. Mer van ein fritje majenais is zie ech neet viës. Via ’t Trevianum in Zitterd kaom ze in kontak mit Borse vrunj die häör höbbe mitgenómme nao ‘t Bessemebènjersriek. Zoa kaom ze bie de vrunjeklup Effe Serieus wobie ze dan ouch is blieve plekke.

Euver zien verwachting van de vastelaovend is hae heël dudelik: “Ich verwach eine sjoane vastelaovend wo-in de Borse luuj, en zeker de jóngere, neet wegtrèkke nao de groate evenemènte, mer ‘t feës viere in ’t dörp, want dat is vastelaovend!

“Doog ’t mer geweun!”

———-

Proklamasie

Bie grasie van de Bessemebènjersproklamasie maak ich, Prins Lars 1 en zien Prinses Anouk, mit dees verklaoring bekènd dat:

Ten 1ste
Weer d’r ontzettend greuëtsj op zeen óm hie 2 x 11 jaor nao pap en mam te maoge sjtaon.

Ten 2de
De kasteleins auch de leedjes van het Borse Leedjes Konkoer mótte dreëje in de kafees.

Ten 3de
Weer de auwers van mien prinses wille vraoge lid te waere van De Bessemebènjers, zoadat weer hun eine sjaone pin op kènne sjtaeke op de Leejemiddig. Dit gult natuurlik auch veur ós vrunj van De Voetbalvrunj Bor en FF-Serieus.

Ten 4de
De voetbalvrunj mich dit jaor mótte misse in d’n optoch. Daorom wil ich ze vraoge veur de prinsewaage oet te loupe.

Ten 5de
Weer auch FF-Serieus gaer in ’t zich höbbe ónger d’n optoch!

Ten 6de
Weer verwachte dat alle luuj van Bor mit ós Vastelaovend viere …. in Bor!

Ten 7de
Weer ós femilie en vrunj wille vraoge de ganse vastelaovend mit ós mit te trèkke. Dit beteikent dat pap en mam dit jaor mer get later op vekansie mótte gaon.

Ten 8ste
Luuk en Paul mich dit jaor neet gans hove te misse biej ’t nummer haole. Ze kriege zelfs ein VIP behenjeling en waere toes gebrach.

Ten 9de
Weer de vastelaovesvereiniging vraoge om auch ein vlag op te hange biej ons nuujt prinselik palies oppe Kepelwaeg. ‘t Seere zal nog plaatsvènje op de Minerva wo weer nog ein paar waeke woone.

Ten 10de
Weer alle deilnummers van de groate optoch oprope auch mit te laupe in de kènjeroptoch.

Ten 11de
Ós liefsjpreuk is:
Doe en ich, ich en dich.
Mit Bordenaere óngerein is toch sjoaner dan eder veur zich.
Hiej mit ós en mit uch, ’t is de vastelaovend dae os altijd same krig.
Twiefelt geer nog euver ’t raod, gael of greun?
Volg ós dan… Doog mer geweun!

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en aafgerope op 7 jannewarie 2017.