Peter woort op 13 augustus 1974 gebaore, es 7000e inwoner van de toenmalige gemeinte Bor, oppe Meulesjtraot. Zien opa en oma hawwe dao ein boerderie wo zien pap en mam doe inwoonde. Hae is ‘nne zoon van Huub en Gertie Buckx. Allebei auch gein ónbekènde in de Borse vastelaovend. Ziene pap waor in 1971 nog prins van de Bessemebènjers.

Wie Peter ein jaor woord, haet’r Bor effe verlaote. Eës drie jaor nao Remunj en daonao tot en mit 1988 haet’r biej de Kwakkerte in Heitse gewoond. Dao is ‘r auch besjmèt geraak mit ’t vastelaovesvirus wie hae jeder jaor mitleep mit de buurt in d’n optoch en pap en mam volgde door de kaffees in Heitse. Nao, ‘nne geweldige jeug in Heitse is ’r in 1988 weer trök gekómme nao Bor.

De eëste jaore in Bor waor Peter nog ‘nne sjtille, mer nao aafloup van zien kola-tiedperk isser ram losgesjlaage. al gaw vónj hae ziene drej en veulde hae zich toes tösje eine groate groep vrunj. In 1997 kaom Peter bie de Raod van 11. Dao beglèdje hae same mit Klee de jeug, mer wiej ‘m dat, door zien drökke baan, te väöl woort, haet ’r die taak euvergedrage aan Ber en Lei.

In ’t dageliks laeve wirk Peter al meër es 18 jaor biej Highlite in Kirkraoj en dao haet’r van zien hobbie zien beroep kènne make. Hae haet namelik ‘nne rare tik: hae is gek van lempkes. Biej Highlite isser ongertösje opgewirk tot hoof inkoup en is hae verentjwoordelik veur ’t ganse produktassortiment mit meër dan 7000 artikele van Highlite. Taegeweurdig reist’r de ganse welt aaf op zeuk nao de lètste nuuj technologiën op ’t gebied van leech, geluid en video. Hae is dan auch zeker ‘nne keër of 5 per jaor te vènje in Sjina en biej veurkeur in ein van zien favoriete sjtaej: Hong Kong.

Auch boete de vastelaovend is Peter geine onbekènde in ’t dörp. Zo is hae ein van de luuj die aan de weeg sjtónge van Höb Se Gezoape, ‘nne bekènde groep in ’t Borse die tot veur ‘n paar jaor garant sjtónge veur geweldige feëste mit sjieke aankleijing. Natuurlik maog auch hun deilname aan de Borse optochte neet óngeneump blieve. In hun hoogtiej daag lepe ze waal mit 100 man door ’t dörp. Door de jaore haer zeen d’r väöl gezinne óntstjange en kènjer biegekómme, wodoor Höb se Gezoape get röstiger gewore is. Mer dit jaor zulle zie nog eine keër alles gaeve óm te laote zeen tot wat zie in sjtaot zeen.

Auch bekènd is Peter biej ’t Kènjervakantiewerk wo hae auch al 21 jaor lid van is. Hae zörg dao ummer veur de decors en zit in ’t besjtuur. Hae besjrif zien taak dao es leiding-bènjende zake, kortweg, hae sjteit ’s aoves achter ’t buffèt.

‘t Is weer ‘ns sins jaore dat v’r ‘nne Prins zónger Prinses höbbe. Mer, zoa es Peter zaet, ’t sezoen is pas sjus begoos, dus d’r kent nog van alles gebeure.

’t Is veur Peter ’n groate eër óm de 6e jubelejumprins van de vastelaovend in Bor te zeen en de 1ste jubeleumprins van de Bessemebènjers. Hae zal ’r dan auch alles aan doon óm mit ’t ganse dörp d’r ein groat feës van te make. Want zoa wie d’r zelf ummer zaet: 220 of 380, vastelaovend viere in Bor is prachtig !

———-

Proklamatie

Ich, Prins Peter I, aangeweze om te regere euver ’t Bessemebènjersriek maak bekènd dat:

Ten 1 ste:
De vastelaovend veur alle luuj zich dit jaor in Bor aafspjeelt. Vanaaf dit jaor gein Knón van ’t Balkón mer ‘nne vastelaovend Bor waerdig.

Ten 2de:
De jeug zich es nuuj ginneratie geit inzètte om ós geweldige revuuj laevend te hawte.

Ten 3de:
De äöpening van ’t sezoen dit jaor weer good aangezat is, en dat v’r dit vanaaf noe maoge vashawte, zoadet v’r in Bor weer ’n äöpening kriege om greuëtsj op te zeen.

Ten 4de:
Ich weit dat ’t verdomp lestig is, mer dat ’t auch waal verrektes sjiek zou zeen es v’r weer eige leedjes in ós Bessemebènjersriek kriege.

Ten 5de:
Vastelaovend ’n feës is van ós allemaol. Ich gaon mich dan auch veur de volle 100 procent inzètte óm d’r ’n sjoan jubeleumjaor van te make: veur jónk en auwt, krank en gezóndj.

Ten 6de:
Ich mien vrunj biej alle vereiniginge in Bor oproop om d’r ‘nne geweldige vastelaovend van te make in BOR !

Ten 7de:
Ich de jónges van de Raod vraog om same mit mich op miene scepter te lètte, anges raak ich dae klommel gegarandeerd ‘nne keër kwiet.

Ten 8ste:
Alle weuninge in ós Bessemebènjersriek dit jaor good verseerd mótte zeen.

Ten 9de:
Ich mien excuses wil aanbeje aan de pap en de mam, want die weite hiej niks van aaf Auch al vas aan mien bure veur de euverlas dae zie gaon kriege de kómmende weake.

Ten 10de:
Ich greuëts bèn op dees vereiniging en euver wat hiej mit dit jubileum allemaol gepresteerd wurd. G’r zult mirke dat de Raod nao dit feës get kleiner wurd doordat get luuj verdeend gaon euversjtappe nao de senaat. Ich daag de jóng men van Bor oet om zich te bewieze en dat zie same mit ós de Raod van 11 weer gaon aanvölle.

Ten 11de:
V’r biej ’t bessemverbrenne väöl klokke maoge zeen, en dat v’r, naodat ’t vuur oet is, kènne zègke: De vastelaovend in Bor is fantasties en sjprènglaevend. Op nao de volgende 11 jaor!

Alaaf!

Aldus opgeteikend en aafgerope op 9 November 2012