Het sjpraekwoord ‘de jeug haet de toekoms’ is bie jederein waal bekènd, aafgeloupe waek höbbe De Bessemebènjers dao flink werk van gemaak! Zoa höbbe ós prinsepare beide Borse basissjoale bezoch veur ein echte vastelaoves-les. Ózze groatvors waor z’n auwt beroep nog zeker neet verleerd, en noom de leerlinge vol enthoezjasme mit in de gesjiedenis van de vastelaovend. Van wie het allemaol begoos is tot wie v’r het anno 2024 viere. Ouch woort de kènjer gevraog wat veur hún noe eg bie de vastelaovend heurde: van verklèije tot de sjlók dae vanaaf de prinsewage wurt gegooid. En natuurlijk koos ein traktaasie neet ontbraeke: heerlikke nonnevotte van Bakkerij Mestrom!
Wiejer woort nog het damesteam E1 van HV Born door ós jeugprinsepaar bezocht, prinses Jara probeert dao jedere wedstrijd mit de puntje bènne te haole. Häör teamgenote zeen d’r mèr gét greuëtsj op dat ze noe ein égte prinses in hun midde höbbe, al mot het team Jara nog effe misse in verbandj mèt eine drökke agenda. Ouch hie haet het vastelaovesgeveul zeer zeker gescoord!
❤️💛💚 Vastelaovend in Bor, same ❤️💛💚
