Auch dit jaor zal de offiesjeele äöpening van de vastelaovend in Bor achterwaege blieve. Es Bessemebènjers höbbe veer mèt de nuèdige zörg de resente ontwikkelinge mèt betrèkking tot het corona-vierus gevolg. Mèt pien in ós vastelaoveshart numme veer ózze verantwoordelikheid en zulle kommende zaoterdig gein offiesjeele hènjelinge verrichte bie het beeld van de Bessemebènjer. Gein vlag die geheese wurt, gein gedich dat veurgelaeze wurt en aansjloetend auch geine video-aovend……ein videofilm woo-in veer gaer mèt uch hauwe wille truuk kieke nao het sezoen van inmiddels alweer twee jaor geleeje, toen het road-gael-greun nog volop aanwezig waor.
De vastelaovend begint natuurlik waal geweun vandaag, äöpening of neet. Haupelik kènne veer dae in het nuuje jaor weer viere zoawie veer dat het leefste doon en het zich auch huèrt: SAAME!
Tot dae tied: blief gezondj en lèt op-ein, vastelaovend saame!
