NIEUWS

Ózze nuuje prins!

januari 9, 2023

De nuuje prins van de Bessemebènjers in ’t jaor 2023 is gewore: Rob Boonen.  Hae zal regere es Prins Rob I.

Rob is gebaore op 26 mei 1973 ónger ’t sjterrebeeld Tweëling in Veghel. Van gebaorte ‘ne Braobenjer oet Mesjtreechse auwers. In 1979 kaom hae es 6-jaorige terech in Buchte. Wie hae in 1998 ging samewone waor Zitterd kort zien woonplaats, mer de roop van ’t dörp waor sjterk en in 2000 ging Rob trök nao Buchte. Totdat hae zich in 2012 definitief vestigde in Bor wo ’t prinselik palies zich bevunjt aan de Heër Ottosjtraot 47.

Dochter Lotte waor de eëste die in 2014 bie de vastelaovend vierende jeugdige Bessemebènjers in Bor veurop ging. Veer jaor later waor de jóngste dochter Loes aan de beurt en es alles good waor gegange, dan haw weer veer jaor later pap Rob de scepter kènne zjwejje euver De Bessemebènjers. Vanwaege de coronaperikele van veurig jaor haet ‘r dit ein jaor mótte oetsjtèlle.

Prinselik blood zit wiet verbreid in de femilie Boonen. Ziene pap waor in zien jeugjaore prins van de middelbare sjoale in Mesjtreech. Broor Phil ging häöm in 2012 al veur bie De Pötters in Pöth en esof dat nog neet genóg is sjtónge zien paetekènjer ouch al op de hoagste vastelaovestraeje bie de jeug in Pöth en Bor.

Rob is in zien geweune laeve directeur van “Source-in”, ’n bedrief dat zich bezig hilt mit ’t zeuke van ’t juste perseneel in ónger angere de waegeboew. Vandao ouch ’t thema van dit jaor: “De waeg kwiet”.

Sins ’n paar jaor is Rob betrokke bie de organizasie van de Mansluujzitting van de Auwt Prinse, zónger auwt prins te zeen. Dat lèste zal volgend jaor neet meë zoa zeen en is ‘r gelegalizeerd es lid van de organizasie.

Rob is lid van vastelaovesgroep de Plekzek oet Aldenhof en ’t Hónsjbrook en deeg al dèk mit aan d’n optoch, leedjeskonkoer en de revuu.

Sjportief is Rob ouch, es rekreatief voleyballer. Daonaeve is ‘r coach van ’t hockeyteam van dochter Loes.

Ómdat ‘r gein tweë lènker henj haet, deit Rob allerlei klusse in en róndj ’t hoes. Behawve tegelzètte en sjtukadore.

Op zunjigmörge geit ‘r meistal wenjele mit ziene vrundj Felix. Zoa kaom ’t dat, inmiddels weer óngerhawf jaor geleje, Vors Cliff op ‘n sjlinkse meneer waor mitgevraog te gaon wenjele. Ónger ’t wenjele woort ‘m de belangrieke vraog gesjtèld of hae prins wól waere van De Bessemebènjers. Die vraog waor verrasjend, mer lang haet Rob neet d’reuver nao hove te dènke. Ónger ’t genot van ’n pilske woort zien entjwoord in ‘n kefeeke in Mesch beklónke.

Vastelaovend is veur Prins Rob ‘n sjpel en dat sjpel mósse sjnappe. Dan höb se väöl plezeer en kèns te dich ‘n good glaas drènke. Vastelaovend verbroedert zaet Rob, óngeach dien aafkóms.
Op de vraog of Rob ouch waal ès de waeg kwiet is, zaet hae: “Aaf en toe, es ’t heël gezellig is gewaes of… es de navigasie ’t neet deit”.

‘ne Prins dae besjlage ten ies kump ónger ’t motto:
“362 daag per jaor netjes in ’t sjpaor,
362 daag ein groat tekort aan tied,
mer die sjoanste 3 daag van ’t jaor,
Allemaol effe lekker “De waeg kwiet”


Prinseproklamasie

Bie grasie van de Bessemebènjersproklamasie maak ich, Prins Rob I bekènd:
1. ‘t Is ein enorm groate eër om dit jaor veurop te maoge gaon in de Borse vastelaovend;
2. De aafgeloupe jaore höbbe veer de vastelaovend mer hawf kènne viere of gans mótte euversjlaon, dat beteikent dat veer dae dit jaor dubbel viere gaon;
3. Vastelaovend in Bor, “mit aafstendj de sjoanste” mer dit jaor viere veer dae toch lekker same, kort biejein;
4. Mit de vastelaovend is jederein geliek, auwt of jónk, erm of riek, krank of gezóndj. Mer lèt ein beitje op ein en op dichzelf. Veul se dich neet gans good en ’t is neet van d’n drank, blief dan thoes, dat sjaelt alweer de hèlf;
5. Es groate luuj höbbe veer de taak óm ’t vastelaovend viere aan ós kènjer euver te drage. Daoróm zou ’t sjoan zeen es jederein dae mit de groate optoch mitlöp, same mit zoaväöl meugelik kènjer in de kènjeroptoch mittrèk;
6. Wie sjiek zou ’t zeen es alle sjtraote van Bor verseerd zeen in road, gael en greun want eërlik is eërlik: zoa heuërt ’t geweun;
7. Same mit ’t jeug- en seniejoreprinsepaar zal ich in jeder geval alles gaeve óm jederein in Bor ‘ne geweldige vastelaovend te laote belaeve;
8. Van mien geweldige dochters, die hie al eëder höbbe gesjtange, zou ich gaer nog get prinselikke tips wille ontvange;
9. Leef Plekzek, ich zou ’t geweldig sjiek vènje es geer uch weer biejein pak en ich haop, dat geer veur de prinsewage oet in d’n optoch mitloup.
10. Jack, ich höb dich ein verzeuk gedaon. Ich vènj ’t geweldig das dich mich es Adjudant bie wils sjtaon;
11. 362 daag per jaor netjes in ’t sjpaor, 362 daag ein groat tekort aan tied, mer die sjoanste 3 daag van ’t jaor, Allemaol effe lekker “De waeg kwiet”

Dees proklamasie gultj van de Sjloes tot aan d’n autowaeg en van de sjpaorbrök tot en mit de Stjeinakkerwaeg.

Aldus opgeteikend en aafgerope op 7 jannewarie 2023