NIEUWS

Gein nuuj prinsepare in sezoen 2021-2022

oktober 14, 2021
𝐄𝐢𝐧𝐦𝐚𝐨𝐥 𝐩𝐫𝐢𝐧𝐬 𝐭𝐞 𝐳𝐞𝐞𝐧, 𝐡𝐞𝐭 𝐬𝐣𝐨𝐚𝐧𝐬𝐭 𝐰𝐚𝐭 𝐝’𝐫 𝐢𝐬…
Dees pakkende tekst oet het leedje dat jeder jaor gezonge wurt bie de aafsjloeting van de vastelaovend zaet eigelik alles. Veer probeere jeder jaor alle luuj van Bor wèrm te maake veur de vastelaovend, en veur de prins (en natuurlik auch prinses) dae dao-in veurop geit mot het ein jaor waere om zien ganse laeve neet meer te vergaete. Dat gultj natuurlik auch net zoa good veur het jeug- en seniejoore-paar.
Veer höbbe lang de mood d’rin gehauwte dat veer dit sezoen weer nuuj prinsepaare aan uch kooste veursjtèlle, om doamèt in de eerste twee moanje van het nuuje jaor saame de vastelaovend te viere……dát viere wat veer veurig jaor zo gemis höbbe. Nao de aansjèrping van het coronabeleid zoawie dat aafgeloupe vriedig is aangekondig höbbe veer eine doorkiek nao de kommende maonje gemaak, in de achterkop hauwtende welke veurbereidinge allemaol neudig zeen bie ós aktiviteite en wieväöl tied die koste. D’r is helaas mèr ein konkluuzie meugelik: veer kènne het onbesjriefelikke geveul dat in het leedje bezônge wurt auch dit jaor neemes beeje.
𝐃𝐚𝐨𝐫𝐨𝐦 𝐳𝐮𝐥𝐥𝐞 𝐝𝐞 𝐁𝐞𝐬𝐬𝐞𝐦𝐞𝐛è𝐧𝐣𝐞𝐫𝐬 𝐢𝐧 𝐡𝐞𝐭 𝐬𝐞𝐳𝐨𝐞𝐧 𝟐𝟎𝟐𝟏-𝟐𝟎𝟐𝟐 𝐠𝐞𝐢𝐧 𝐧𝐮𝐮𝐣 𝐩𝐫𝐢𝐧𝐬𝐞𝐩𝐚𝐚𝐫𝐞 𝐨𝐞𝐭𝐫𝐨𝐨𝐩𝐞, 𝐞𝐢𝐧 𝐛𝐞𝐬𝐣𝐥𝐨𝐞𝐭 𝐝𝐚𝐭 𝐯𝐞𝐞𝐫 𝐦è𝐭 𝐩𝐢𝐞𝐧 𝐢𝐧 𝐡𝐞𝐭 𝐡𝐚𝐫𝐭 𝐠𝐞𝐧𝐨𝐦𝐦𝐞 𝐡ö𝐛𝐛𝐞.
Dat wilt neet zèkge dat veer neet zulle probeere om dao woo meugelik de vastelaovend aan de gang te hauwte. Het geplènde oetreupingswiekent, mèt het Bors Leedjes Konkoer op zaoterdig en GeBaORe Talent op zunjig, motte veer helaas annuleere. Mèr de datum geit zeker neet verlaore en krig ein digitaal alternatief. Omsirkel uch daorom 8 jannewaarie mèt eine dikke sjtif oppe kalender, en volg ós hie op de socials veur meer info euver het online-programma.
Het belaof eine interaktieve aovend te waere, dae uch vastelaoveshart vas en zeker wèt te raake, en woomèt veer haupe mèt uch in kontak te blieve. Vastelaovend vier se immers saame!
Aan alternatieve programma’s op anger datums wurt nog drök gesjleutelt, dao informeere veer uch zoa sjnel wie meugelik euver woobie ein en anger natuurlik auch aaf zal hange van aanpassing van de maatreegele die al dan neet in het nuuje jaor gaon gèlje. Num van ós aan: veer doon alles wat meugelik is om zoavöäl meugelik aktivieteite doorgank te laote vènje of d’r minstens ein alternatief veur te bedènke.
Blief gezondj en lèt op-ein, vastelaovend saame!