2024 - Jeugprins Sean I Koch & jeugprinses Jara Bucks

Tot Jeugprins van De Bessemebènjers van ’t sezoen 2024 is oetgerope: Sean Koch. Hae geit regere es Prins Sean I Hae wurd biegesjtange door Jara Bucks. Zie geit regere es Jeugprinses Jara

Sean zoog ’t laevesleech op 28 fibberwarie 2013, ónger ’t sjterrebeeld vösje. ’t Bezunjere is dat deze datem auch de gebaortedaag is van zien euvergroatmoder en veurmalige senioreprinses Zus Versluis. Nog opmirkelikker is, dat hae persies 2 x 11 jaor nao häör heërsjappie euver ’t Bessemebènjersriek zellef de prinselikke rol vervölt. Sean koestert al gerume tied de wunsj óm jeugprins te waere. Es kleuterprins haeter oats in ein zenuwsjlopende finale net neet de scepter weite te bemachtige. De teleursjtèlling waor groat toen. Aafkómstig oet ein vastelaovesgezinde femielie, veural aan moders kentj, waor ’t veur Sean ein deepgewortelde ambitie. Terwiel ziene pap, eine greuëtsje “Steinder Bók”, de feësvreugde van vastelaovend pas in de lèste jaore jaore ech haet leëre kènne. Zien mam, eine richtige bessemebènjer, waor jeugprinses in 1994. Zien tantes Claudia en Linda, sjus wie nónk Tim, höbbe de prinselikke tietel al ‘ns maoge drage. Dit jaor volg Sean zellefs in de vootsjpaore van zien nichske Myrthe. Ziene opa haet jaorelank ein aktieve rol vervöld in de Raod van 11 en es Vors. 

Sean is de jóngste sjproet in de femielie Koch. Ziene broor en zöster zitte oppe middelbare sjoal. Zellef zit hae in groep 7b van basissjoal Swentibold. Boete de sjoalmoere kènse häöm vènje bie Jong Nederland. Óm in bewaeging te blieve, sjpeelt hae gaer ’n pötje tennis, mer zien groatste passie lik bie zien accordeon. Hiemit haeter al meër keëre optraejes verzörg op jeugmiddige. 
Regelmaotig vunjse Sean achter de sjpelkompjoeter of knutselend aan allerlei nuuj kreasies.
Sean is auch ein sjlókmoel en dao zal ‘t ‘m neet aan óntbraeke mit de vastelaovend. Laote v’r houpe datter auch nog get babbelaere geuëjt nao de kènjer langs d’n optoch.

Jara is gebaore op 14 fibberwarie 2014 ónger ‘t sjterrebeeld waterman. Ein ech
valentijnskiendje. Ze woont oppe Bornerveldsjtraot 97 same mit häör mam Saskia, Nancy en Finn.
Natuurlik kenne veer Jara ́s groatste laevende knuffel neet vergaete: häöre hóndj Mello.
Dae is altied blie es ze weer toes kump van ein van häör hobbies.
Jara is nogal ein bezig bieke. Vervaele kump dan auch neet in häör woordebook veur.
Zoa deit ze trómme bie de drumband van Hermenie L ́Union Bor sinds ze 5 jaor is.
En vanaaf de oprichting van de Jeugdrumband Aw Gemeinte Bor is ze auch dao van de pertie. Mit eine paeternonk es drummer en tamboermaeter, en neet te vergaete Bep, die de drumband
in häör blood haet zitte, is dit neet zoa gans gek.
Daobie trómmelt Finn auch, haet Nancy jaore bie de hermenie van Beeg gesjpeeld en koos
Saskia vreuger redelik euverwaeg mit de piano. Mer op muziek mósse bewaege. En auch dat kènt Jara. Jaore haet ze gedans bie Femfit mit heël väöl plezeer. Sins veurig jaor waol ze ein sjtepke wiejer make. Noe deit ze wedsjtrieddanse bij ADC. Ein nuuj oetdaging wo ze vol veur geit.
Dan haet ze nog get tied euver en dae vult ze in mit hendjballe. Jara hendjbalt bie de E1 van HV Bor. Same mit t ganse team prebere ze jedere zaoterdig te wènne, al lök dat neet altied.
“Same” is get wo Jara blie van wurt. Ze is eine allemansvrundj en geneet dan auch enorm van gezelligheid. Of dat noe is op 1 van häör hobbies, toes, bie häör vriendinne, es ze geit jatse mit häör BFF Liv of op sjaol.
Jao, me zou ‘t missjien neet dènke, mer ze haet nog tied om nao sjoal te gaon. Auch dat deit ze mit väöl plezeer. Jara geit al vanaaf groep 1 nao OBS De Wissel. Ze zit in groep 7/8 van meister Erik. Wat waor ze blie wie dit sjoaljaor begoos, want vanaaf groep 7 krig ze eindelik hoeswerk. Dao keek Jara al jaore nao oet.
Oetkieke, dat deit ze auch jeder jaor nao de vastelaovend. Vanaaf häör gebaorte haet ze nog gein jaor euvergeslage. In de kènjerwage, amper 3 waeke auwt, sjtóng ze al in de zaal van ‘t gemeinsjapshoes. Vanaaf ze koos laupe leep ze d’n optoch mit. En sins 3 jaor begint t nao de zomervakansie te kriebele. Same mit Isa geit ze dan aan de sjlaag om weer veur uch ein optraeje inein te zètte veur op de kènjermiddig.
Dit jaor hej Jara flinke kriebels. Zou häöre naam getrokke waere om jeugprinses te waere……. Toen t telefoontje kaom dat ze de gelökkige waor, sjtraolde ze dan auch van oar tot oar.
Sjtraole zal ze vanaaf noe tot aan esjelegoonsdig same mit häöre prins Sean 1, want same wille dees tweë d’r eine fantastische vastelaovend van make veur alle poete van ’t Bessemebènjersriek.
Oppe tróm of mit d’n trèkzak, ‘n tuut sjlók of al dansend róndjsjprènge,
Ós Jeugpaar zal dit jaor de vastelaovend in Bor de heuëgte inbrènge.
Alaaf