2023 - Jeugprins Rik I Widdershoven & jeugprinses Myrthe Colaris

Ut jeugprinsepaar van De Bessemebènjers in ’t jaor 2023 is gewore: Rik Widdershoven en Myrthe Colaris. Zie zulle regere es Jeugprins Rik 1 en jeugprinses Myrthe.

Rik woort gebaore op 12 juni 2010 in ’t ziekehoes in Zitterd ónger ’t sjterrebeeld Tweëling. Rik is de zoon van Maikel Widdershoven en Sandy van Schijndel. Hae haet nog ’n zösterke Isa van 9 jaor en same wone ze oppe Gaarsjtraot 60. Pap is opgegreujd in Bor es echte Bessemebènjer en leep es kèndj al mit de buurtvereiniging mit in d’n optoch. Mam is gebaore en getaoge in Buchte en is dao Jeugprinses van de Louvermen gewaes.

Rik haet zien eëste vastelaoveservaringe opgedaon es Prins bie kènjerdaagverfblief Jippie de Pippie in Buchte. Rik zaot, wie d’r gevraog woort óm Prins te waere op Basissjoal De Wissel, mer inmiddels zit ‘r noe op ’t Mosa RT in Maaseik.
De groatste hobby van Rik is voetballe bie VV Bor. Op zien viefde laevesjaor is ‘r begoos es voetballer, mer noe is hae de kieper bie de JO14-1. Hae is fan van Fortuna Zitterd, Ajax en Barcelona en haet bie al dees klups wedsjtriede gezeen in de versjillende stadions. Van Fortuna haet ‘r zelfs ‘n sezoenskaart zoadat ‘r mit pap en de Voetbalvrunj Bor bie de thoeswedsjtriede de klup kènt aanmoedige. Zunjes-sjmörges is hae es trouwe supporter ummer langs de lien te vènje Op d’n Taore bie de wedsjtried van die Voetbalvrunj Bor.

Van kleins aaf aan löp Rik mit die voetbalvrunj al mit in d’n optoch. Hae is dan ouch ‘ne carnavalis in hart en nere. Al jaore wunsj hae zich èns gevraog te waere óm jeugprins van de Bessemebènjers te waere. Deze wunsj geit noe nao heeeël lang wachte in vervölling. Van de veurmalige prinse Lars en Lei haet ‘r al èns de sjteek en scepter maoge probere.

Rik brunk gaer tied door bie zien opa’s en oma’s. Ouch vrundsjappe óngerhawte is belangriek veur häöm, zoawaal de vrunj van pap en mam es zien eige vrunj, wo-mit hae gaer op ’t voetbalveldj róndjhink, of deit game. Rik is heël sociaal en hilt van luuj óm zich haer.
Zien faveriete vakansiebesjtömminge zeen Turkije, Frankriek en Spanje. Nao de zomervakansie begint ein van de anger favoriete bezighede aan ‘m te knage: vuurwerk. Al maonje van te veure is ‘r dao al mit bezig. Pap en mam waere d’r gek van. Hae verheug zich altied enorm op auwtjaors-aovend. Sins ’n paar jaor organizere pap en mam óm 17 oer ‘n knalsessie veur de jeug mit glühwein, aolieböl, waffele en… vuurwerk. Wat dat betruf is ’t motto van ’t Jeugprinsepaar op zien lief gesjreve.

Myrthe woort gebaore op 22 juni 2010 ónger ’t sjterrebeeld Kreef. ’t Waor dat Myrthe ’t väöl te good haw in de boek van de mam, want anges waor zie sjus wie Prins Rik ouch gebaore ónger ’t sjterrebeeld Tweëling.
Myrthe is de auwtste zöster van Lars, Emily, Esmé en Ryan. Same wone ze op Hónjsbrook 7.

Myrthe zit in ’t eëste jaor van ’t Atheneum op ’t Trevianum. Tweë keër per waek geit ze traine oppe judomat in Beeg. Daonaeve dans Myrthe heël gaer! Daoveur traint zie bie Angelia’s Dance Center en bie Flashdance in Obbeeg. Mit ’t team van Angelia deit ze mit aan wedsjtriede. In augustus zeen ze mit ’t team driede gewore op de Waereld Kampioensjappe in Blackpool. Haet ze nog get vriejen tied, dan is Myrthe gaer op jats.

Al versjillende jaore waor Myrthe zich aan ’t verheuge óm zich eindelik op te maoge gaeve veur Jeugprinses. Pap en mam vroog ze de oare van de kop euver wie dat noe zaot mit opgaeve en wat se dan allemaol geis doon es prinses. Wie kan ’t ouch anges, ’t prinsesseblood haet ze neet van ‘ne vraeme. De pap van Myrthe, Kevin Colaris is bie de Lombokkers in Berg aan de Maas Jeugprins gewaes in 1996. De mam, Linda Kleinheerenbrink is ‘ne echte Bessemebénjer. Zie waor in 1989 Kleuterprinses en in 1995 Jeugprinses. Ouch häör tantes Sandra en Claudia en häöre nónk Tim höbbe in ’t Bessemeriek maoge róndjsjprènge es jeugprins en -prinsesse. En neet oppe lèste plaats waor opa Dick jaore aktief in de Raod van Èlf en es Vors.
Nao heël lang wachte en ouch nog ‘ns ’n dik jaor de móndj hawte en ’t geheim hawte is Myrthe d’r heëlemaol klaor veur. Ze verheug zich enorm op deze vastelaovend en is d’r zeker van dat ze d’r same mit Jeugprins Rik ein gesjlaag feës van geit make.


Veer, Prins Rik I en Prinses Myrthe vènje ‘t super sjiek om te maoge regere euver ’t Bessemebènjersriek en make bie deze bekènd dat;

Ten eëste
Lang euver gedruimd en noe is ‘t waor,
V’r zeen het nuje jeugprinsepaar van de Bessemebènjers van Bor

Ten tweëde
Meërdan ein jaor höbbe veer dit geheim gedrage,
Dat de vastelaovend ‘t veurig jaor neet doorging, waor veur ós lestig te verdrage

Ten driede
Eindelik is de Corona achter de rök,
En höbbe veer de Borse vastelaovend weer trök

Ten veerde
V’r vènje ‘t sjiek es ós femielie en vrunj samen mit ós vastelaovend kómme viere in Bor,
Want in ós prachtige dörp zit dat waal sjnór

Ten viefde
V’r haope dat deze keër de groate optoch door kènt gaon,
En v’r baove op de prinsewage kènne sjtaon

Ten zösde
Want nao de oetreuping en d’n optoch kieke v’r erg oet
En goaje mit plezeer väöl appelsiene en sjlók oet

Ten zevende
Voetbalvrunj Bor, ouch van miene scepter blief g’r aaf,
Mer mit d’n optoch loup g’r veur de jeugprinsewage aaf

Ten achste
Haopelik dreëje ze in de kefees veur ós het leedje “Vrunj tot de allerlèste runj” van Spik en Span,
Dao zeen v’r namelik heëlemaol weg van.

Ten neugende
Allebei ós auw sjoale (Swentibold en De Wissel) zeen haopelik mit ós in hun sas,
En haole mit vastelaovend alles oet de kas

Ten teënde
ADC (Angelia’s Dance Center) mót ’t mesjien af en toe zónger mich doon,
Mer mit de revuu kènne ze in Bor op ’t podium ein denske kómme doon

Ten èllefde
Es keeper van de JO14-1 van VV Bor probeer ich geine wedsjtried euver te sjlaon,
Mer dan mót mien team waal bie d’n optoch langs de waeg sjtaon

Weer gaon gaer mit uch de vastelaovend in ónger ‘t motto:
Nao ein geheim van meë dan ein jaor is het noe klaor
En kènne v’r eindelik gaon knalle mit de Vastelaovend in Bor.

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en bekènd gemaak op 8 jannewarie 2023