Ós Jeugprinsepaar

’t Jeugprinsepaar veur kómmende vastelaovend is gewore Jayden Bas en Lyara Heynis. Zie zulle regere es Jeugprins Jayden I en Jeugprinses Lyara.

Jayden is op 11 augustus 2009 thoes gebaore. Eigelik haw de gebaorte in ‘t ziekenhoes mótte plaatsvènje, mer dao haw Jayden geine tied veur. Hae haw zoane haos mit gebaore waere dat de verloskundige häöm nog sjus koos opvange.

Jaydens sjterrebeeld is leëw en wat de geleërde hie-euver vertèlle kump vrie good euverein mit wie Jayden is.
Jayden is de zoon van Pieter en Patricia Bas, hae haet eine groate broor Damian en tweëling breurkes Mayson en Brighton. ’t Prinselik palies sjteit in de Wijngaardskamp nómmer 78.

De pap Pieter is gebaore en getaoge in ’t Louverriek in Buchte. De mam Patricia is gebaore en getaoge in Remunj bie de Uule. Jayden is sjus wie zien drie breurs eine echte Bessemebènjer. Jayden zit op basissjoal Swentibold in groep 7b bie meister Jurgen Offermans, Hie haeter ’t good nao ziene zin. Hae zörg d’r jedere mörge veur dat alle laptops in de klas klaor sjtaon en na sjoal is ’t auch zien taak d’rveur te zörge dat ze weer good waere opgeruimp.

Jayden is ein aktief menke. Jedere Maonjig en dónderdig is hae op de atletiekbaan te vènje. Auch maaker gaer meziek. Hae sjpeelt bugel. Op woonsdig krig ‘r les en op vriedig sjpeelter mit in ’t Jeugorkes van Vriendenkring Limbricht.
Vanaaf zien gebaorte is Jayden eine echte sjprèng in ’t veldj. Hae geiter gaer op oet en is dan auch dèk bie ‘nne vrundj sjpele of sjprunker oppe fits óm zien opa en oma te bezeuke.

Lyara is het jóngste lid van de femilie Heynis. Zie is gebaore op 7 fibberwarie 2008 in Zitterd ónger ‘t sjterrebeeld Waterman. Auch hie waor de verloskundige net op tied óm häör op te vange, ze waol dr sjnel oet, mer veur de vastelaovend waor ze net tweë daag te laat.

Häöre pap Dave is groat gewore in t riek van de Gangmaekers oet Heal. Mam Chantal kump oet t riek van de Tempeleers van Mestreech. De zöster van Lyara hèt Jylana en is ‘nne echte Bèssemebenjer.

Lyara zit in groep 8 bie juf Truus van Sloun op basissjoal Swentibold. Ze is van kleins aaf aan al ein bezig bieke. Zoa waol ze noaits sjlaope en verboewde ze regelmaotig häör kamer. Auch geit ze elke donderdig nao Jong Nederland. Häör hobbies zeen danse en zènge en dat deit ze bie Pakkie An in Obbeeg. Häör levelingsdeer is ‘nne giraf, dee haw ze wel gaer in d’n tuin wille höbbe.

Vastelaovend zit häör zeker in t blood. Ze geit al van kleinsaaf aan mit, en es pap en mam nog neet nao hoes waole, waor dat gein prebleem, zie veel euveral in sjlaop: in de kènjerwaage, oppe biljart of op de taofel in de kentien, mer heives waol ze neet. Auch sjprunk ze jeder jaor same met häör vrundinne in d’n optoch róndj bie c.v. Op ‘t Rendje! Noe sjprunk ze effe same mit häöre prins op de prinsewage. Dat is wo zie en auch Jayden al heël lang van gedruimp höbbe. En noe is dae druim oetgekómme en loupe ze veurop in de polonaise.

Zie neuëdige alle Borse Bessemebènjerkes oet óm mit hun mit te gaon ónger ’t motto:

Mit Prins Jayden en Prinses Lyara aan de top Kump de Borse vastelaovend neet meër sjtop!

—–

Jeugprinseproklamasie:

Veer prins Jayden en prinses Lyara vènje ‘t super sjiek om te maoge regere euver ’t Bessemebènjersriek en make bie deze bekènd dat;

Ten eërste
Wat uch zeker zal opvalle,
Is dat veer zeker ós bès gaon doon mit plat kalle.

Ten tweëde
Ózze groatste druim zouw oetkómme hawwe veer noaits verwach,
Daoróm zeet geer op ós gezich ‘nne groate lach.

Ten driede
Miene bugel sjteit veur effekes aan de kentj,
Om te regere euver t bessemebènjerslendj.

Ten veerde
Mien sjöttekleid gejt noe effe in de kas,
Want dit prinsessekleid is wat d’r baeter bie pas.

Ten viefde
Noe ren ich effe neet op de atletiekbaan,
Dus in de polonaise roop ich, kóm mer achter mich aan!

Ten zösde
Eindelijk is de drök van ós aaf
En roope veer heël hel, ALAAF!

Ten zevende
Höbbe veer zunjig mit vastelaovend sjneë, sjtórm of raege,
De Borse optoch vilt noaits taege!

Ten achste
Op t Rendje veur ós dat zouw ich sjiek vènje,
dan kèn ich namelijk kieke wie zie sprènge.

Ten neugende
Veer gaon nog lang neet nao bed
Tot in de late oere deit jederein mit ós mit.

Ten teënde
Veer gaon noe same d’r ’n top- feës van maake,
Mit alle auwer luuj en zeker de jóng sjnake!

Ten èllefde
Mit vors Clif en buurman en buurman es adjudant,
hawte veer de Borse vastelaovend in de hendj.

Weer gaon gaer mit uch de vastelaovend in ónger ‘t motto:

Mit Prins Jayden I en prinses Lyara aan de top
Kump de Borse vastelaovend neet meër sjtop!

Dees proklamasie gultj van de Sjloes tot aan de d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en bekènd gemaak op 12 jannewarie 2020.