Ôs Jeugprinsepaar 2019

Is dit jaor Levi van Hout en Noa Fransen. Zie gaon regere euver ’t Jeugbessemebènjersriek es Jeugprins Levi I en Jeugprinses Noa.

Op 1 mei 2007 woorte mam Anke en pap Olv verrasj mit de gebaorte van Levi: ein JUNGSKE, terwiel ‘t volges de veursjpelling toch ech ein maedje zou waere. Zien sjterrebeeld is sjtier en hae kreeg de duipnaame Levi, Maria, Carolus, Benjamin. Benjamin omdat hae de jóngste is van 4 breurs en 3 zösters.

Zien roets likge in Zitterd, mèr hae woont noe al weer 7 jaor mit mam en Snoopy de hoesknien in Bor oppe Keuningsjtraot. Levi zit op basissjoal de Wissel bie juf Leone en juf Ellie en hae kènt neet wachte pès hae nao Zitterd ként fitse nao de nuuj sjoal.

Zien hobbies zeen voetballe bie VV Born en voetbal kieke bie zien klupke in gael- greun. Jedere wedsjtried is hae same mit zien breurs en voetbalvrunj te vènje op de tribuun van Fortuna.

Feëskes viere same mit femieje en vrunj vuntj Levi fantastisch en auch ‘t feëske van vastelaovend is häöm good bekènd. Mitloupe in d’n optoch mit de sjötterie in Bor en auch dèks in de Zittesje kènjer- en groate optoch. En ‘t altied te vreug vènje óm heives te gaon!

In 2007 ging Levi oet zien daak wie hae sjoalprins woord en dat sjmaakde nao meër! Hae is euvergelökkig om dit jaor same mit prinses Noa en uch, d’r ein sjoan feëske van te gaon maake.

Prinses Noa is bienao mit de roaj naas op gebaore, want einen daag nao d’n 11de van d’n 11de in 2007 woord Noa gebaore oppe Graethei. Ze is ’t jóngste zösterke van Jill, Thomas en Sam en dus auch de benjamin van de femielie.

Häör mam, Ingrid, is van Zitterd en haet ummer vastelaovend gevierd in ’t Marotteriek. Vanaaf ’t Auwt Wieverbal op donderdig pès ’t heëringbiete op woonsdig waor ze dao prezent. De pap, Dirk, is ‘nne Belsj, gebaore in Zutendaal dae zien vastelaoveservaringe opdeeg in Laonaake.

Noa zit in groep 7, bie juf Truus, van de Swentiboldsjoal. Esse vrie haet, dan zit ze ummer op häör paerd, häör groate passie. Ze sjpeelt auch saxefoon bie de jeughermenie van L’Union en deit aan hip-hop bie Angelina. Veur Noa is d’r eine druim in vervölling gegange. Vanaaf groep 3 waor ze bevange door ’t vastelaovesvierus en bie ’t eëste sjoalvastelaovesbal zag ze drek: “Dat wil ich auch!” En noe in 2019 sjteit ze d’r es Jeugprinses van De Bessemebènjers.

Dees tweë wille d’r ’n feëske van gaon make ônger ’t motto:

Mit sjteek en kreuënke oppe kop, goan veer greuëtsj in elke polonais veurop!

Jeugprinseproklamasie:

Weer, Jeugprins Levi 1ste, aangeweeze òm same mit mien prinses Noa te regere euver ͛t Bessemebènjersriek, make bie deze bekènd dat:

Ten 1ste
Ich mien bès doon óm plat te kalle, dao zal ich waal ein bietje mit opvalle;

Ten 2de
Mien paerd kómme noe effe neet oet de sjtal, want ich bèn nao ’t vastelaovesbal;

Ten 3de
Mien voetbalsjoon effe blieve sjtaon, want dat is mit de vastelaovend niks gedaon;

Ten 4de
‘t Wurt ein fantastisch feës, zoa wie ‘t nog noats is gewaes;

Ten 5de
Ich zèng oet volle borst mit en heuër auch gaer van uch dat ‘t leedje zit;

Ten 6de
Veur miene piano en sax is effe geine tied heuër, want road, gael en greun is noe de kleuër;

Ten 7de
Ich ‘t ganse jaor mien klupke support in geal en greun, vanaaf noe mit road d’rbie allein mèr gekke teuën;

Ten 8ste
Ich neet weit of ‘t plat kalle geit lökke, mer dat maog de vastelaoves-sjpas neet drökke;

Ten 9de
D’r gein sjoal en hoeswirk is en online neet bèn te vènje, ich wil mit uch hosse en sjprènge;

Ten 10de
Ich noe wil gaon geneete en effe geine sjtres, dit jaor bèn ich de Jeugprinses;

Ten 11de
Veer make sjpass, lol en plezeer mit ein glaeske frisj en de groate luuj ein pötje beer.

En dat alles ónger ’t motto:

Mit sjteek en kreuënke oppe kop, goan veer greuëtsj in elke polonais veurop!

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en bekènd gemaak op 13 jannewarie 2019.