Rens van Baaren woort gebaore op 17 maart 2014 in ‘t ziekehoes van Zitterd-Gelaen ónger ‘t sjterrebeeld “Vösje”. Hae woont in de Mgr. Buckxsjtraot 8 es zoon van Pascal en Miriam en zien zösterke Kiki, die 9 jaor auwt is. De kat Kiri van angerhawf maak ’t gezin Van Baaren kompleet.
De pap en de mam zeen in 2010 prinsepaar in ’t Bessemebènjersriek gewaes. Rens en Jill waore in 2017 kleuterprinsepaar op ’t kènjerdaagverblief ’t Kidshöfke in Bor. Opa en oma waore toen senioreprinsepaar bie de Zawpense in Beeg. Dao-oet bliek waal dat ’t vastelaovesgeveul waal in ’t blood zit bie Rens. 
Rens reup al jaore dat ‘r gaer jeugprins wilt waere. Tweë jaor geleje haet ‘r es figurant mitgesjpeeld bie de oetropingsact, wat hae geweldig vónj. Hae is dan ouch superblie, dat ‘r noe is ingelaot en maog regere euver de jeug in ’t Bessemebènjersriek van Bor.
Rens zit in groep 8 van basissjoal Swentibold bie juf Britt, wo hae mit väöl plezeer haer geit. Zien hobbies zeen wedsjtriedzjwömme bie de Watervrienden Neptunes Born, wo hae in 2025 op ’t NK juniore goud haolde mit de vrieje sljaag, zilver oppe sjoalsjlaag en röksjlaag en bróns oppe vlindersjlaag in de kattegorie B. 
Voetballe bie VV Bor deiter ouch sinds ein jaor. Rens is al sinds hae 4 jaor is, lid van Jong Nederland, mer ouch gamen en hutte boewe hilt Rens van de sjtraot. Wiejer is Rens al jaore lid van de vastelaovesklup Rebelsj wo-bie hae eder jaor mittruk in d’n optoch. Ouch in de mini Playback Sjoo, ’t huidige geBaORe Talent, waor Rens eine vaste deilnummer.
Rens verheug d’r zich op óm in d’n optoch op dae hoage wage te sjtaon en same mit Jill en de anger prinsepare sjlók en appelsiene oet te goaje.
Al van kleins aafaan geit Rens mit in de vastelaovend en wilt dan noats heives, dus dit jaor zal hae mit väöl plezeer veurop gaon in de polonaise tot in de late uurkes.
Dat zal hae same doon mit zien jeugprinses Jill, die woort gebaore es Jill, Erwin, Helma de Regter op 31 oktober 2013 in Zitterd. Zie woont same mit häör auwers Johan en Mariëlle in de Ómsjtraot 48. Háór mam is ein ech Bors maedje en pap kump oet Wieërt. Inmiddels versjtaon de meiste luuj häöm gelökkig good. 
Jill deit al ‘n aantal jaor same mit vriendinne mit aan geBaORe talent. 
’t Prinsessezäödje zal bie Jill geplant zeen, wie häör naefke Koen Stoffels jeugprins waor van de Foetelaers oppe Nuujsjtadt. Van jóngs aaf aan viert Jill mit häör femilie vastelaovend. Van de kleine feëste in ’t dörp tot de groate regionale feëskes en noe is zie óntzettend greuëtsj, dat ze dit jaor mit maog doon es jeugprinses van De Bessemebènjers.
Jill zit ouch in groep 8 van basissjoal Swentibold bie ein superleuke juf Britt. Toen de Bessemebènjers belde dat zie kómmend jaor jeugprinses zou waere, waor zie zoa bliej, dat ze ’n oer lank door de kamer gesjtuterd haet.
Jill zit op hendjbal bie HV Born en ouch zie is lid van Jong Nederland, wo ze same mit vrunj en vriendinne väöl plezeer belaef. Thoes haet ze ein leef knienke dat hèt Vlekkie en bènnekort kump dao nog ein hundje bie.
Häöre lèste verjaordaag vierde ze mit ein sjlaopfeëske. Neuge meide nome toen hoeze De Regter in besjlaag en van sjlaope is neet zoa väöl terech gekómme. Feëskes zeen dus ech waal häör dènk!
Zie is ein echte sjorpioen: entoezjas en ein bietje óndeugend. Zoa wie gezag waor ze al ‘ns kleuterprinses same mit Rens en vanaaf toen vuntj ze vastelaovend geweldig.
Jill is ein groate leefhöbster van sushi, mer eigelik lös zie alles en ut ze euveral en ummer. Zie haet dan ouch ein aetmotto: “Ich mót get höbbe!”
Dit jaor maog zie es jeugprinses van De Bessemebènjers ’t feës leije, ederein mitnumme en d’r veur zörge dat vastelaovend groat, gezellig en ónvergaetelik wurt. Ze belaof dat ze geit lache, danse zènge en plezeer make mit ederein. Same mit Rens en alle kènjer van Bor make ze d’r ein fantasties jaor van, vol konfettie, plezeer en sjoan herinneringe.
Ouch veur Jeugprins Rens en zien jeugprinses Jill is ’t mit de vastelaovend “Ummer Raak!”