Sven woord gebaore op 16 jannewarie 1995 es Sven, Marcello van Sloun ónger ’t sjterrebeeld Sjteinbók. Hae is ‘nne zoon van Wim en Anita van Sloun , breurke van Kyra en Kay en d’n tweëlingbroor van Stan, dae auch al joare lid is van de road van 11.

Hae wirk veur de euverheid in Mesjtreech. Hae is jaeger, get wat hae haet mitgekrege van ziene pap. Zien passie lik dan auch veural bie de natuur en ’t miljeu. Daodoor is hae dagelijks bezig mit de zörg veur ’t miljeu en de natuur in de gate te hawte

In z’ne vriejentied is Sven vereinigingsminsj. Al 8 jaor lid van Sjötterie St. Martinus en bie ’t OLS verentjwoordelik veur de organisatie van ’t Kènjer-OLS, haeter beweze meër in zien mars te höbbe en woord hae in 2023 de nuuje veurzitter van de Sjötterie.

Zoawie d’r zellef zaet, zaot hae te wachte tot ze häöm eindelijk ‘nne keër kaome vraoge óm prins te waere van De Bessemebènjers. Wie de Vors bie hun aan de deur sjtóng mit dees belangrieke vraog, haeter dao gein mement euver hove nao te dènke.

Sven viert vastelaovend ummer in eige dörp. “Sjpas maakse veural mit de luuj die kort bie dich sjtaon. Same zeen en flawwekul make en ’t leefste blieve tot ‘t allerlètste.”

Vastelaovend is veur Sven ‘nne tied dasse nurges meër raekening mit hoofs te hawte en vrie bès van alle sjtres.

Euveral duuk hae waal urges op, is ’t neet es lid van Effe Serieus, dan löp hae waal mit ‘nne groep van de sjötterie in d’n optoch, of sjteiter oppe buun mit “De Raod Taegedraods”. Auch isser al ’n paar jaor lid van ’t optochkommetee.

In 2019 preufde hae veur d’n eëste keër ech aan ’t vastelaoveslaeve: hae waor de nar bie ziene vrundj Prins Youri I. Dao waore al meër femielie-leeje die häöm veurginge es hoagheid in de vastelaovend. Auch opa Thei in 1954 en nónk John in 1984 waore prins in Bor. Ziene pap Wim waor nog Bartok-prins. Zellef waor hae tweë keër in de rees veur Jeugprins, mer haw de pech ummer te waere oetgelaot.

Noe geiter ech veurop in de Borse vastelaovend, same mit zien sjarmante Prinses Senna.

Zie woord gebaore es Senna, Nicola, Shauny op 13 fibberwarie 1995 ónger ’t sjterrebeeld Waterman in Uermend. Zie is ’n maedje van Marcel en Yolanda Caelen.

Senna kènde Sven al ’n aantal jaore, want häör ganse femielie woont in Bor, wo zie dan auch dèks verbleef. In 2020 besjlote ze same te gaon wone oppe Jean Barbou van Roosterensjtraot 20 in Bor.

Senna wirk bie Vivantis op de communicatie aafdeiling in Bunderhof in Gelaen. Dao is zie verentjwoordelik veur ’t biehawte van de sosjale media, ’t make van flyers en breve veure de luuj ónger Vivantis.

Dees ervaring kump häör good van pas bie de taak es sikretaris van Sjötterie St. Martinus. Vanzelfsjpraekend waor zie aktief in de organizasie van ’t OLS. Dao waor ze lid van, wie kènt ’t auch anges, de wirkgroep communicatie.

In de vriejentied geit ze gaer wenjele mit d’n hóndj Frenkie en es Sven geit jage, geit Senna mit es driever same mit d’n hóndj.

Auch krejatief bezig zeen, lekker knutsele en freubele deit Senna heël gaer. De verseringe veur op de sjtaontaofele bie zich thoes, veur es d’r mit de vastelaovend luuj euver d’n dörpel kómme, haet ze al gerume tied klaor.

Auch bie Senna zeen d’r al meër femielieleeje die ’n belangrieke rol sjpeelde in de orse vastelaovend. Oma Ineke en senioreprinses, nónk Ber en tante Lud es prinsepaar, nónk Bela es prins in Houtem, en naef Youri es prins van De Bessemebènjers.

In dit jubeleumjaor sjmulte d’r es ’t ware tweë vastelaovesfemielies same, wodoor weer d’r van euvertuug zeen dat hie ’n fantasties prinsepaar sjteit, dat óngetwiefeld geit zörge veur ein sjitterend jubeleum en eine geweldige vastelaovend.

Vasteloavesvierders van Bor, let op! 

7×11 jaor vastelaovend in Bor, dat sjut op!