Dat waor de liefsjpreuk van ózze vruntj en kammeraod Jack Maessen, dae ós op deensdig 17 september in de vreuge aovend op 66 jaorige laeftied haet motte verlaote. Ondanks dat v’r wiste dat het d’r neet good oet zaog blif se altied houp hauwte, houp dat ‘nne richtige vastelaovesvierder (en dat waor Jack op en top) nog lang bie ós kènt blieve.
Auwt prins van De Bessemebènjers in 2012 es Jack IV en zelfs al veur dae tied……es stagiair……bie de Raod van 11. Dat stage loupe haet auch gemaak dat d’r nog get diskussie waor euver wanneer hae noe eindelik zien 1×11 jaorig jubileum koos viere. Gans Bor zal nog waal weite dat dat oeteindelik in 2021 gewaes is, Jack regelde namelik geweun zien eige resepsie. Altied bezig mèt de verbènjing in het dörp, en mèt het betrèkke van de jeug bie de vastelaovend. Mènnige klas sjoalkènjer is op maondig nao het prinsoetroope hunne sjoaldaag begoosj mèt ein les kultuurgeschiedenis van ózze Jack.
Zien gezondjheid maakde dat hae ein sjtèpke truuk haet gedaon bie de Raod van 11 en toen de Senaat is gaon versjtèrke. Het bleef neet bie zien versjtèrking, nae Jack wis mèt zien aimabele weurd zelfs oud-leeje truuk te haole nao de vereiniging en keek oet nao ‘nne sjoane tied same mèt zien vrûnj. Het haet helaas neet meer zoa maoge zeen.
Namens besjtuur, Raod van 11, Senaat en prinsepaare van VV de Bessemebènjers wunsje veer de femilie en jederein dae Jack leef hauw heel väöl sjterkte mèt dit verlees. Eine gooje minsj is van ós heen gegange, veer geneete noe veur altied van zien aanwezigheid in ós laeve
Jack, bedank en het geit dich good!! ❤️💛💚
