Huub is gebaore op 11 augustus 1948 in Bor ônger de name Hubertus, Johannes, Leonardes.
Gertie is gebaore op 5 oktoaber 1951 in Zitterd ónger de name Gertruda,  Albertina, Hubertina, Maria.

Huub greujde op in Bor, mer vertroch es 18-jaorige sjtudent nao Den Bosch óm te sjtudere aan de HAS es laevesmiddeletechnoloog. In 1973 sjtudeerde hae dao aaf. Aan ’t werk koos ‘r doe nog neet, want eës moos hae nog angerhawf jaor mersjeere in ’t leger es deensplichtige.

In 1971, hae sjtudeerde nog in Den Bosch, woord Huub gevraog óm te regeere es Prins van de Pierewieters. Daomit is hae dit jaor d’n eëste Prins dae auch es Senioreprins de scepter zjwèjt in vastelaovendvierend Bor.

In 1974 trouwde Huub mit zien Gertie en ginge ze in Remunj wone. Hae wirkde dao es laborant bie de Campina, ’t huidige Friesland Campina. In totaal haet Huub 37 jaor bie de Campina gewirk in versjillende functies wobie hae gans Nederlendj en Belsj haet doorkruus. Nao tweë jaor in Remunj te höbbe gewoond vertrochte Huub en Gertie nao Heitse wo zie 11 jaor höbbe gewoond. In dit Midde-Limburgs dörpke waore Huub en Gertie gein onbekènde en zeker in de vastelaovestied wis Heitse wae zie waore.

Planne óm truuk te gaon nao Bor waore d’r neet, mer in 1988 is dat door omsjtènjighede toch gebeurd en trochte zie mit zoon Peter nao de Sjteinakker in Bor. Al gaw waore Huub en Gertie ingeburgerd. Huub woord besjtuurslid bie de hermenie, richde de Auwt Prinse op en ontworp veur de buurt “Achter ’t Sjpaor” jaorelank de vastelaoveswages. Daonaeve kreege de Auwt Prinse de taak óm in ein act de nuuje Prins oet te roope. Noe bedènk Huub al 30 jaor same mit de Awt Prinse dees oetreupingsact en boewt hae hiebie ein passend decor.

Naeve wènjele is Huub zien groatste hobby ’t óntwerpe van decors. Mit dees hobbie is Huub inmiddels groat leveranseer van de Zitterdse oktoaberfeëste.

Gertie woord neet allein gaw lid van ’t dameskommitee van Hermenie L’Union, mer auch lid van de lokale vrouwebóndj in Bor woovan ze auch jaorelank besjtuurslid is gewaes. Daonaeve is zie al jaorelank aktief lid van ’t Oranjekommitee en deit ze väöl vriewilligerswerk in ’t bejaardehoes.

Wiejer is Gertie al 25 jaor lid van de Zonnebloem en in die hoedanigheid beud zie väöl behoeftigen ein loesterend oar en hulp ze dao woo ’t bènne häör meugelikheeje lik. Mer auch es anger vereiniginge of instanties aankloppe geuf zie gaer ein helpende handj.

Veur al dat good vriewilligerswerk waat Gertie haet verrich, is zie in 2009 geridderd in de orde van Oranje Nassau.

Huub en Gertie zeen dèk gezeene gaste op mènnig evenement. Dat doon ze dan auch ônger hun laevesmotto: “Plök d’n daag, want ’t kan zoa veurbie zeen.”