Mit de oetverkeezing van Lei is d’r weer ’n vastelaoves-sirkelke róndj. Hae is namelijk ’n kleinkèndj van Zef Heutmekers, d’n eëste Prins van de Pierewieters.

Lei woord gebaore op 7 november 1981 ónger ’t sjterrebeeld sjorpioen in Aelse bie de Sajelaere. Neet lang haeter dao gewoond, want wie Lei 2 jaor waor verhoesde hae nao Maleisië, vanwaege ’t werk bie Stamicarbon van de pap. Nao 3 jaor kaome ze weer trök en ginge ze wone oppe Poswaeg.
In groep 4 van de basissjoal kaom hae Marjon taege. Toch haet ’t nog gedoerd pès 2005 eër ze ginge samewone oppe Graathei nómmer 6. In 2009 vónje zie ’t tied óm hun verbènjtenis vas te lègke mit ’n boterbreefke. Ze wone nog ummer op de Graathei, al zeen dao ongertösje waal drie kenjer (Anna, Driek en Roos) en eine honjd ‘Sjarel’ bie gekómme.

Lei is al jaore aktief bie de voetbalklup en ’t waor dan auch dao, wo hae Marjon weer taege kaom. Marjon trainde de F-jes en woord verzörgster bie de B-jeug wo Lei voetbalde. “Doe wils neet weite wie dèk of dae ónger ‘nne wedsjtried oppe gróndj ging ligke”, aldus Marjon. “En dan moos ich weer mit ’t sjpunske ’t veldj op óm ‘m op te lappe.”
Auch noe is Lei nog ummer aktief op ’t veldj bie ’t viefde èlftal. Auch traent hae de jeug en is daodoor väöl daag in de waek “Op d’n Taore” te vènje.
Lei wirk al zoan 6 jaor bie Van Ommeren in Sjtein, wo hae waegbebakening verköp.
In Maleisië zaote meër Limburgers bie-ein, wodoor zien pap en mam zellefs in Maleisië aktief mit de vastelaovend bezig waore. Wie ze trök kaome oet Maleisie waore zien awwers aktief bie zaate hermenie “’t Zjwaak Bläöske”. De pap waor in Aelse dèks deilnummer aan de Aelser Revuu. Zoa woord de vastelaovend bie Lei mit de paplaepel ingegaeve en dus is het neet vraem dat hae zellef, wie d’r awwer woord eine vaste deilnummer woord aan d’n optoch. Veural mit de voetbalvrunj zèt hae jeder jaor ’t dörp op sjtelte.
Normaal is Lei eine sjtille geneeter, mer mit vastelaovend kump dat vastelaoves-gen van de Heutmekers baovedrieve: de tent oppe kop zètte mit allemaol gekkigheid. Dit jaor wurd dat bekroand mit ’t prinssjap van De Bessemebènjers.

Marjon, ‘n maedje van Thijs en Paula Olijve woord gebaore op 11 juni 1981 oppe Graathei ónger ’t sjterrebeeld tweëling. Auch zie deit al van kleins aaf aan mit aan de vastelaovend. Häör eëste groate optraeje, es 5-jaorige, waor op de Kènjer Plee Back Show mit ’t leedje “Wiebele, wiebele”. Pap Thijs zunk al ’n aantal jaore zien gezèllige leedjes op allerlei aktiviteite. In 2015 waore Thijs en Paula ós Senioreprinsepaar.

Marjon is net es Lei neet meër weg te sjlaon oet de vastelaovend in Bor. Zie waor 20 jaor trómpetis bie de Sjravelaere en treujt jaorliks op mit De Dollies. Ze wònne mit ’t leedje “Dans mit mich” ’t leedjeskonkoer. Daonao dege ze ‘t nog ‘ns euver mit: “Vieze Vèttige Vastelaovend”. Sind drie jaor deit ze ouch mit, mit de Blötsje. Veurig jaor wónne ouch zie in Bor mit ‘t leedje “Repmarie” en behaolde zie mit “Roekoekoe” de twiefelachtige eër van sjlechste vastelaovesleedje van Limburg.
In 2008 woord ze Blötsj van ’t jaor oppe Vrouwluuj-zitting en sins 2014 presenteert ze same mit Niels Dullens de Borse Revuu. Marjon vunjt ’t geweldig óm vastelaoves tekste te sjrieve en is daoróm jeder jaor weer bliej es de vastelaovend zich aankondig. Mit de vastelaovend zellef dompelt zie zich ’t leefste onger mit häör zösters en vrundinne.
In ’t dageliks laeve wirk Marjon es zelfsjtenjige bie Olijfgroen. Zie advizeert bedrieve wie ze ’t bèste kènne verduurzame. ‘nne Tied geleeje haet ze zellefs ’n geweldig sjtök gesjreve euver wie de vastelaovend verduurzaamp kènt waere.

Weer höbbe weer ein sjitterend Prinsepaar gevónje dat vastelaovend viere van de pap en de mam en zellefs van de opa haet mit gekrege, wodoor weer mit rech kènne zègke: “Veur ummer vastelaovend”.

Bie grasie van de Bessemebènjersproklamasie maak ich, Prins Lei II mit mien Prinses Marjon bekènd:

Ten 1ste:
Vastelaovend is van jederein! Blötsje, Dolly’s, Voetbalvrunj, veur-, achter-, en ónger- ’t sjpaor, Bor auwt, Bor jónk, erm of riek, mit beer of cola, sjoan vies of vettig, op sjtraot of toes achter de vinster, jederein heuërt d’r bie!

Ten 2de:

De revuu-groep is veur ’t eës bliej dat ze nog gein kloate gedaon höbbe, ómdat ze anges op nuuj hawwe kènne beginne.

Ten 3de:
Vanaaf noe heuëre veer in Bor allein nog mer Borse sjlagers. Es Lars ’t nog neet mit spotify geregeld haet, kènt geer ein ceedee bie häöm aafhaole. De hoesjes ligke bie Peter! Thijs maog ze zoa lang zènge es dr wilt en alle anger Bessemebenjers auch!

Ten 4de:
Rens en Annemiek kènne zich toch noait aan de optochvolgorde hawte, dus loupe de voetbalvrunj, veur de prinsewage oet.

Ten 5de:
De voetbalvrunj maoge de wage toch op de hei boewe, mer wae Lei de septer klauwt sjmiete v’r in het knaal. Om de Vastelaovend te besjerme zulle veer d’r veur waake, dat ze nao d’n optoch, gein beer mitsjmókkele het Gemeinsjapshoes in!

Ten 6de:
Wae nog neet aan ‘t wage boewe begoos is haet gelök. Dit jaor kump d’r eine pries veur duurzaamste optochkrejasie. Dus mankrach, biologisch afbraekbare- en 2e hendsj kraom scoort.

Ten 7de:

‘t Kloonebal op de Hei besjteit 2,27 x 11 jaar. Daoróm veur jederein op waeg nao ’t Kloonebal, tot 11 oer sjpek mit ei op Graethei 6. De kemping van ’t Kloonebal zal dit jaor flink oetgebreid mótte waere, mit zeker 11 sjtendjplaatse.

Ten 8ste:
Bessem zeike. Mit vastelaovend hawte veer ós óngerein de sjpegel veur en daomit vraoge v’r ós óngerein aaf of veer nog waal good bezig zeen. Wae dao neet taege kènt maog, wie Jeanny zaet: “taege eine bessem aan gaon sjtaon zeike en nao zien eige geklaag gaon loestere”

Ten 9de:

De kepelkes maoge’t rippertwaar oetbreije veur de deensdigaovend, aangezeen ’t eine lange wenjel wurd nao de Hei. Missjien kriege ze versjterking van de Sjravelaere en wae wèt lök t’ ze óm “Vastelaovend is veurbeej” van ós helde Rówwen Hèze te sjpele zoadat de bessem in sjtiel wurd verbrend.

Ten 10ste:
Veer wunsje dat jederein mit vastelaovend zich teminste eine keër verlus in ‘t mement en regels en tied en plaats vergut. Este dènks “Ich kèn neet meër”, is ’t dich gelök de zeël van de vastelaovend te laote laeve in os dörp!

Ten 11de:
Opa zef is same mit de Pierewieters vlak nao d’n aorlog begoos mit kwatsj om ’t laeve te viere, en hae haw noats durve druime dat de vastelaovesvereiniging nao 73 jaor nog ummer zou besjtaon. Auch de pap en mam van Marjon ginge ós al veur. Daoróm is ós motto:

Zoalang veer vastelaovend viere, laeve v’r
Vergaet neet te laeve en vier de vastelaovend
Van opa Zef tot vandaag en vanaaf vandaag veur ummer …
Veur ummer vastelaovend!

Dees proklamasie gultj van de Sjloes tot aan d’n autoweg en van de sjpaorbrök tot en mit de Stjeinakkerwaeg.

Aldus opgeteikend en aafgerope op 11 jannewarie 2020.