In het riek van de Swentibolders, amper 7 maond gedrage en mit ‘n gewicht van ‘nne gooje kielo, zaog hae es Waterman op 31 jannewarie 1970 ‘t laevensleeg. Zien mam baejde nog of ‘t ‘n unske meër maogde waere. Noa ziene broor en zöster is hae de jòngste van de femielie Stegeman

Es jònk menke waor George heël aktief, bedreven in voetballe en karate. Oeteindelik isser waeges ”tiedgebrek” euveral mit gesjtop. Noe löp er allein nog mer mit d’n hòndj.

Gebaore woord George in Gelaen, mer hae woont al bienoa 25 joar gelökkig in Bor. Nao eës gewoond te höbbe in de Martinushof verhoesde hae noa de Prins Bisdomsjtroat, òm oeteindelik oppe Postweg oet te kòmme.

Noa de leëgere sjoal en de LTS haet ‘r de MTS auch nog aafgemaak en toen is er veur zien bòtterham gaon verkaupe, totdat hae oeteindelik ‘t (led)leeg zoog en zien eige bedrief haet opgesjtart: Luminesense. Veur zien wirk geit’r jeder jaor waal ‘nne keër noa Sjina om sjinees te aete en dao auch nog van alles te regele veur zien zaak.

Es g’r soms dènk waat is ‘t in Bor aan het ròmmele, dan is George weer aan ‘t tròmmele. George huit al jaore op ein tròm. Mit de vastelaovend ging die ummer troe mit esser op sjtap ging. D’n drumbend van oos fantastiese hermenie leërde häöm de beginsele, zodat’t auch ein bietje aan te heuëre waor esser op die tròm begoos te hauwe. Daonao sjtapde hae euver nao de sjötterie wo hae es dikke tromsjläger aan de gang koos.
Vastelaovend wilt George noats misse. Al 2 keër 11 jaor truk’r verkleid es viking mit die daag door ’t dorp. Veurig jaor maakde hae zich eine nuuje helm mit tweë heures van ein koo d’r baovenop. Dae waor zoa sjwaor dat ’t neet väöl haw gesjaeld of ’t haw ‘m eine nekhernia gekos.

Somers geit George gaer mit zien gezinke nao de Sjpaanse Costa del Sol, of wie hae ’t zellef neump: de Kosta del Lol.

Es trotse papa haet’r zien henj vol aan zien twee geweldige dochters Anouk en Ilse. Es d’r dan nog get tied euver blif, dan zètter zich d’n helm op, krup in ’t laere pak en dan kretst’r gaer een uurke op ziene moter door ’t Limburgs lendj!

Noe George in januari 2014 ziene 4 x 11 jaorige verjaordig viert, höbbe veer ‘m gevraog òm te regere euver ós geweldige Bessemebènjersriek. ‘nne Heële gezellige bourgondiese vent, dae mit ederein auwhoort en op ziene tied gaer ‘n pilske pak.

Weer höbbe d’r alle vertroewe in dat George d’r eine gooje vastelaovend van geit make, allemaol ònger ‘t motto:

‘t Geit in Bor flink krake, want v’r gaon d’r mit z’n alle ‘nne geweldige vastelaovend van make. Vergaet veural neet ’t belangriekste van dees sjpreuk:
Vastelaovend in Bor dat is ….LEUK!

———-

Proklamasie

Bie grasie van de Bessemebènjersproklamasie gaef ich, Prins George 1, dees verklaoring oet wo jederein zich aan te hauwte haet:

Ten 1ste
Jederein deit mit aan de tweë optochte van Bor.

Ten 2de
D’r maog neet gezeiverd waere euver de pries van d’n optoch, ‘t geit toch om de sjpas.

Ten 3de
Drie daag in Bor deit nemes get anges es danse, drènke, sjprènge en zènge.

Ten 4de
Veer zulle allemaol leef zeen veur jederein.

Ten 5de
Waer of gein waer, allemaol d’roet, kauwt of werm, pak uch same in d’n erm.

Ten 6de
Ich haup dit jaor miene groep Biejeingeraap es mien garde aan mien zie te maoge höbbe in d’n optoch.

Ten 7de
Luuj die herrie höbbe òngerein, mòtte zich same eine drènke en nurges meër aan dènke.

Ten 8ste
Auch dit jaor heuëre weer euveral òs sjoan road, geal, greune Bessemebènjersvane oet te hange.

Ten 9de
Ich haup dat mien dochters dit jaor get meër vastelaovend viere es vreuger.

Ten 10de
Dank en respek veur òzze vors en ziene wieze road, en alle gangmakers d’ròmhaer veur het rejaliezere van ‘nne ònvergaetelikke vastelaovend.

Ten 11de
En op esjelegoonsdig allemaol heëring biete om geine kater te kriege.

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en aafgerope op 11 jannewari 2014